U Hrodnie źjaviłasia ptuška, padobnaja da ružovaha hołuba
Ružovy hołub, ilustracyjnaje fota, floranimal.ru
Miascovyja ŚMI pišuć, što niekatoryja hrodziency bačyli ružovaha hołuba, jaki pasialiŭsia ŭ rajonie raki Haradničanka, za budynkam harvykankama.
Śpiecyjalisty, adnak, śćviardžajuć, što ružovy hołub nie moh apynucca ŭ hetych miaścinach. Jak patłumačyŭ BiełaPAN śpiecyjalist pa pryrodaachoŭnych pytańniach hramadskaha abjadnańnia «Achova ptušak Baćkaŭščyny» Siarhiej Zujonak, ružovy hołub — źnikajučy vid hałuboŭ, zaniesieny ŭ Čyrvonuju knihu Mižnarodnaha sajuza achovy pryrody. Ličycca, što hetyja ptuški vodziacca tolki na vostravie Maŭrykij u Indyjskim akijanie. Peŭny čas ružovy hołub znachodziŭsia na miažy źniknieńnia i byŭ vyratavany dziakujučy namahańniam śpiecyjalistaŭ Džersijskaha zaaparka Džerałda Dareła.
Na siońnia ŭ śviecie na voli naličvajecca ŭsiaho kala 25 asobin hetych ptušak, jašče prykładna 150 asobin žyvuć u zaaparkach i znachodziacca ŭ arnitałahičnych kalekcyjach.
Tamu, adznačajuć śpiecyjalisty, ružovy hołub nijak nie moh apynucca ŭ Hrodnie. Chutčej za ŭsio, heta svojskaja paroda hołuba niezvyčajnaha vyhladu.