U aŭtakatastrofie pad Varšavaj zahinuŭ palituciakač Siarhiej Łaŭruščyk, stvaralnik pryvatnaha muzieja ŭ Navahradku
Kala Varšavy ŭ darožna-transpartnym zdareńni zahinuŭ 59-hadovy Siarhiej Łaŭruščyk, paviedamlaje Radyjo Svaboda. Jon byŭ stvaralnikam pryvatnaha muzieja ŭ Navahradku.
Siarhiej Łaŭruščyk.
Varšaŭskaje vydańnie piša, što zdareńnie adbyłosia kala 11 hadziny 16 lutaha. Sutyknulisia dva hruzaviki i adzin mikraaŭtobus.
Pavodle papiaredniaj infarmacyi, kiroŭca mikraaŭtobusa ŭrezaŭsia ŭ zadniuju častku paŭpryčepa hruzavika. Na mikraaŭtobus najechaŭ jašče adzin hruzavik. U vyniku DTZ zahinuŭ kiroŭca maršrutki. Heta i byŭ Siarhiej Łaŭruščyk.
Siarhiej Łaŭruščyk — palituciakač. Sutyknuŭšysia ź pieraśledam siłavikoŭ paśla pratestaŭ 2020 hoda, jon musiŭ vyjechać ź Biełarusi. Spačatku žyŭ u Kijevie, zatym pierabraŭsia ŭ Varšavu. Tam uładkavaŭsia na pracu.
«Vieru, što pažyvu ŭ volnaj Biełarusi», — kazaŭ Siarhiej u hutarcy sa Svabodaj u krasaviku 2021 hoda.
Siarhiej Łaŭruščyk šeść hadoŭ stvaraŭ pryvatny muziej u Navahradku. Pakoi svajho doma jon advioŭ pad roznyja epochi — ad VKŁ da BSSR. Praz aktyŭny ŭdzieł u pratestach da jaho pryjšła milicyja — u dzień jaho naradžeńnia, 23 sakavika 2021 hoda. Ekspanaty pryznali zbrojaj, haspadara doma — amal złačyncam.
U Biełarusi ŭ Siarhieja zastałasia siamja. Ciapier vyrašajecca pytańnie ab pachavańni.