U Nacyjanalnym aeraporcie «Minsk» pabudujuć hatel i čyhunku da stalicy
Hetyja pytańni abmiarkoŭvalisia 20 žniŭnia na pasiadžeńni štaba pa rekanstrukcyi aeravakzalnaha kompleksu, u jakim uziaŭ udzieł ministr transpartu i kamunikacyj Ivan Ščerba, paviedamili BiełaPAN u pres-słužbie Mintransa.
Jak zajaviŭ hienieralny dyrektar RUP «Nacyjanalny aeraport «Minsk» Dźmitryj Mielikian, na sumiežnaj z aeraportam terytoryi płanujecca pabudavać hatelny kompleks. Zaraz viadziecca pošuk patencyjalnych inviestaraŭ.
Mielikian rastłumačyŭ, što, chutčej za ŭsio, pahadnieńnie ab uźviadzieńni kompleksu budzie padpisana ź italjanskim bokam — pradstaŭniki mienavita hetaj dziaržavy vykazali najbolšuju zacikaŭlenaść. U toj ža čas, paralelna viadziecca pošuk i inšych inviestaraŭ.
U Nacyjanalnym aeraporcie «Minsk» budzie refarmavana ŭsia sistema absłuhoŭvańnia pasažyraŭ, z tym kab maksimalna nablizicca da jeŭrapiejskaha ŭzroŭniu. U pierśpiektyvie da aeraporta budzie padviedziena i čyhunka ź Minska, pa jakoj pasažyry chutka i niadoraha zmohuć dabracca ŭ stalicu.
Hiendyrektar RUP «Nacyjanalny aeraport «Minsk» paviedamiŭ, što z 5 žniŭnia viaducca kruhłasutačnyja ramontnyja raboty na ŭźlotna-pasadačnaj pałasie. Pavodle infarmacyi pres-słužby Mintransa, surjoznaje abmierkavańnie vyklikała tema adnaŭleńnia padjaznoj estakady. Jak vyjaviłasia, u hetym pytańni jašče zastajecca mnostva sprečnych momantaŭ i pa peŭnych aśpiektach padradčyki dahetul nie mohuć damovicca. Kiraŭnik Mintransa Ivan Ščerba zapatrabavaŭ, kab adkaznyja za rabotu asoby dasiahnuli parazumieńnia najbližejšym časam i pačali rekanstrukcyju estakady.
Za pieršaje paŭhodździe 2009 hoda RUP «Nacyjanalny aeraport Minsk» absłužyła 417.827 pasažyraŭ, što na 0,7% bolš u paraŭnańni z anałahičnym pieryjadam 2008 hoda. Pry hetym za šeść miesiacaŭ 2009 hoda vykanana 4.116 rejsaŭ; pieravieziena 3 młn. 836,4 ton hruzu, što na 3,6% bolš.