Hienprakuratura daručyła zatrymlivać padazravanych u roście cen, a KDK uvioŭ śpiecyjalny numar dla pryniaćcia danosaŭ
Sprava z zabaronaj cenam raści razhortvajecca. Akramia pryniaćcia adpaviednych pastanoŭ cyvilnymi orhanami, za jaje realizacyju ź impetam uzialisia i siłavyja. Sačyć za cenami ŭ kramach buduć, u pryvatnaści, prakuratura i Kamitet dziaržaŭnaha kantrolu.
Sačyć za cenami ŭ kramach ciapier budzie i prakuratura. Pa ŭkazańni hienprakurora, va ŭsich rehijonach Biełarusi prakurory buduć analizavać infarmacyju ab praviedzienych kantrolnymi orhanami pravierkach i manitorynhach, faktach pavieličeńnia cenaŭ, pryniatych mierach reahavańnia, zvarotach hramadzian dy jurydyčnych asob i vynikach ich razhladu, paviedamlaje pres-słužba Hienprakuratury.
Viedamstva zapatrabavała ad Śledčaha kamiteta, MUS i DFR KDK nieadkładna raspačynać kryminalnyja spravy pa kožnym fakcie parušeńnia zakanadaŭstva, jakoje paciahnuła nieabhruntavany rost cen, zatrymlivać padazravanych i abirać mieru strymańnia ŭ vyhladzie zaklučeńnia pad vartu.
U toj ža čas Kamitet dziaržkantrolu adkryŭ śpiecyjalny karotki numar, pa jakim možna paviedamić pra pavyšeńnie cen. Patelefanavać pa im mohuć jak zvyčajnyja hramadzianie, jakija zaŭvažyli pavyšeńnie cen, tak i pradstaŭniki handlovych arhanizacyj, kali vytvorcy prapanujuć im pradukcyju pa cenach, vyšejšych za tyja, jakija skłalisia pa stanie na 5 kastryčnika.
Hetyja rašeńni — vynik učarašniaj narady z udziełam Łukašenki, na jakoj apošni zahadaŭ dyrektyŭna spynić rost cen u Biełarusi. Paśla taho zabarona pavyšać lubyja ceny bieź śpiecyjalnaha dazvołu była aformlenaja pastanovaj urada, siońnia taksama adpaviednuju dyrektyvu vydaŭ Łukašenka, pra ŭziaćcie cen pad kantrol zajavili «sienatary» i inšyja čynoŭniki.