Jak dasłać pasyłku palitźniavolenym z-za miažy?
Na ciapierašni momant u Biełarusi za kratami znachodzicca bolš za 1400 palitviaźniaŭ. Bolšaści ź ich błakujuć listavańnie. Pasyłki ŭ takoj situacyi jość nadziejnym sposabam padtrymki źniavolenych. «Viasna» raspaviadaje, chto moža dasłać pasyłku, što ŭ jaje možna pakłaści i jak zrabić heta z-za miažy.
Kamu možna dasłać pasyłku?
- Palitźniavolenyja, sud nad jakimi jašče nie adbyŭsia i prysud nie ŭstupiŭ u siłu, majuć prava atrymlivać banderoli i pasyłki ŭ nieabmiežavanaj kolkaści. Pasyłku takim viaźniam moža dasłać luby čałaviek, u tym liku z-za miažy.
- Znajści i vybrać palitviaźnia, pačytać padrabiaznuju infarmacyju možna na sajcie «Viasny» — prisoners.spring96.org
- Palitviaźniam, jakija ŭtrymlivajucca ŭ SIZA-6 i SIZA-7, pasyłki lepš nie dasyłać, bo tam jany zaličvajucca ŭ 30-kiłahramovy limit u miesiac.
Zaŭvaha: paśla razhladu apielacyjnaj skarhi (kali jana padavałasia) i ŭstupleńnia prysudu ŭ siłu dasyłać pasyłki ŭ abmiežavanaj kolkaści majuć prava tolki rodnyja.
Što vy možacie pakłaści ŭ pasyłku?
- ziefir, cukierki, marmieład, paściłu, chałvu, šakaład;
- bulbu chutkaha pryhatavańnia, makarony chutkaha pryhatavańnia, sup chutkaha pryhatavańnia, šmatki (hračanyja, aŭsianyja);
- vialenaje miasa, kaŭbasu (syravialenuju, syravendžanuju);
- syr;
- kavu lubuju, čaj listavy;
- arechi, kurahu, finiki, cukaty;
- piečyva, suchary;
- ciopłyja škarpetki;
- kanvierty, arkušy papiery, paštoŭki, sšytki;
- kalarovyja ałoŭki, fłamastary, šarykavyja asadki (čyrvonyja zabaronienyja).
Što dakładna nielha dasyłać?
- čarnaśliŭ, razynki, słaniečnikavyja siemiečki, kazinaki;
- šmatrazovyja stanki dla haleńnia;
- biaśpiečnyja nažnicy;
- šalik;
- vilhotnyja survetki, vatnyja pałački;
- zapalničku;
- płastykavy posud;
- pameła i hrejpfruty;
- piekinskuju kapustu;
- sol;
- knihi, časopisy, kryžavanki, skanvordy.
- akvarel.
Jakija abmiežavańni dla pasyłak z-za miažy?
Da 1 krasavika 2023 hoda norma adnoj pasyłki z-za miažy składaje 31 kiłahram, a košt usiaho, što pierasyłajecca, pavinien być nie bolej 1000 jeŭra. My raim rabić nievialikija pasyłki koštam da 30-40 jeŭra. Na pošcie vas paprosiać zapoŭnić formu i pieraličyć, što vy dasyłajecie i kolki heta kaštuje.
Jak spakavać pasyłku?
Z usiaho, što vy nabyli ŭ pasyłku, treba źniać fabryčnuju ŭpakoŭku, zrezać cetliki, a pradukty charčavańnia pierakłaści ŭ prazrystyja pakiety. Instrukcyju pa pryhatavańni i nazvu praduktu možna vyrazać i pakłaści ŭ pakiet. Pa mahčymaści napišycie pieralik usiaho ŭkładzienaha ŭ pasyłku na arkušy papiery na ruskaj ci biełaruskaj movie.
Na pošcie vy možacie vybrać karobku pamieru, jaki vam padychodzić, ci vykarystoŭvać svaju. Nie zabudźcie napisać usie danyja palitviaźnia, u tym liku imia pa baćku i adras utrymańnia. Zvyčajna pasyłku možna adsočvać pa štrych-kodzie, jaki vydajuć na pošcie. Tak vy daviedajeciesia, što jana nie zhubiłasia i trapiła da viaźnia.
Ujavicie nievierahodnuju ŭdziačnaść i radaść čałavieka, jaki atrymaje vašu pasyłku. Heta znak taho, što pra jaje ci jaho nie zabyli, znak padtrymki i viery ŭ volnuju Biełaruś.