Łukašenka: «Takoha razhildziajstva ja nidzie nie bačyŭ!»
Kiraŭnik dziaržavy daručyŭ vyjavić vinavatych u zryvie prajekta submikronnaj vytvorčaści na «Intehrale» i razabracca z najaŭnaj situacyjaj.
Alaksandr Łukašenka daručyŭ vyjavić vinavatych u zryvie prajekta submikronnaj vytvorčaści na «Intehrale» i razabracca z najaŭnaj situacyjaj.
Takuju zadaču pastaviŭ kiraŭnik dziaržavy, naviedvajučy ŭ piatnicu minskaje navukova‑vytvorčaje abjadnańnie «Intehrał», dzie jon paznajomiŭsia z realizacyjaj prajekta pa stvareńni ajčynnaj submikronnaj vytvorčaści.
«My vydzielili ŭ svoj čas srodki, pastavili vam umovy. Vy ich vykanali?
Nie. Vy ničoha nie zrabili i siońnia prosicie vydzielić jašče, — skazaŭ Alaksandr Łukašenka. — Nie raźličvajcie, hrošaj bolš nie budzie.
Siońnia razmova idzie ab tym, chto za ŭsio adkaža. Za hetyja hrošy my mahli b stvaryć novuju vytvorčaść. Mianie siońniašniaja rabota pradpryjemstva nie zadavolvaje. Mnie takaja praca nie patrebna».
«Vy pryjšli da mianie, skazali: dajcie nam hrošy. Byli tysiačy prapanoŭ, u tym liku i pa prodažy «Intehrała». Ja jaho nie pradaŭ, vydzieliŭ vam hrošy. Vy skazali: voś try prajekty, praź niekalki hadoŭ my budziem davać u kaznu. Prajšoŭ čas.
Dzie tavar? Dzie addača?» — źviarnuŭsia kiraŭnik dziaržavy da prysutnych.
Na pradpryjemstvie płanavałasia realizavać try asnoŭnyja prajekty submikronnaj vytvorčaści.
Ciapier asnoŭny prajekt «Submikron K» praktyčna nie pracuje.
Zapazyčanaść pradpryjemstva pierad kredytorami i dziaržavaj składaje kala Br300 młrd. Jak padkreśliŭ Łukašenka, pradpryjemstva nie atrymaje bolš ni biudžetnych srodkaŭ, ni pazyk.
«Za biudžet my nie budziem utrymlivać ni adnu vytvorčaść.
Budziem zychodzić z taho, što hrošaj bolš nie budzie!» — skazaŭ kiraŭnik dziaržavy.
Jak adznačyŭ kiraŭnik pradpryjemstva Vital Saładucha, kab prajekty pačali pracavać na mahutnaść, nieabchodny čas na technałahičnuju davodku. Da kanca 2010 hoda vytvorčaść moža vyjści na zapłanavanyja mahutnaści.
Pieršy vice‑premjer Uładzimir Siamaška prainfarmavaŭ kiraŭnika dziaržavy, što ciapier pradpryjemstvam asvojena piać vyrabaŭ, da kanca 2010 hoda płanujecca asvoić jašče 20. Tady prajekt budzie akuplacca. Urad prapanuje svoj varyjant pieraadoleńnia kryzisnaj situacyi na «Intehrale», h.zn. pradpryjemstvu nieabchodna dać status Parku vysokich technałohij, akcyjanavać i vydzielić dadatkovyja srodki, kab da kanca nastupnaha hoda vyjści na zapłanavanyja pakazčyki. Adnak, jak padkreśliŭ Łukašenka, jaho nie zadavolvajuć takija dziejańni. «Pradavać zavod ja nie hatovy, u tym liku i akcyjaniravać. Kali vy chočacie restrukturyzavać daŭhi, idzicie ŭ banki, damaŭlajciesia ź imi, — skazaŭ Alaksandr Łukašenka. — Šukajcie hrošy, dzie chočacie, ale biudžetnych hrošaj vy nie atrymajecie i padatki budziecie płacić spaŭna».
Alaksandru Łukašenku pakazali technałahičny praces vytvorčaści intehralnych mikraschiem u ramkach inviestycyjnaha prajekta «Submikron K». Adnak jon zaŭvažyŭ:
«Tut niama čaho hladzieć! Ja nie chaču ŭnikać u technałohiju.
Nu i što, što składanaja vytvorčaść. Heta dla mianie składana, a dla vas nie pavinna być składanaściej. Vy ž kapijujecie suśvietnuju praktyku».
Łukašenka daručyŭ pravaachoŭnym orhanam, Kamitetu dziaržaŭnaha kantrolu, Administracyi prezidenta razabracca, chto vinavaty ŭ nieefiektyŭnym raschodavańni srodkaŭ, zryvie terminaŭ, i dałažyć. «Heta razmova datyčycca ŭsich u krainie. Pa zakonie budzie.
Pa zakonie pavinny siadzieć — budziecie siadzieć. Nie vinavatyja — siadzieć nie budziecie», — padkreśliŭ jon.
Nastupnym pradpryjemstvam, ź situacyjaj na jakim maje namier razabracca Łukašenka, stanie Škłoŭskaja papiarovaja fabryka, a zatym — hrodzienski «Azot».
Alaksandr Łukašenka taksama naznačyŭ adkaznym za heta pradpryjemstva pieršaha namieśnika premjer‑ministra Uładzimira Siamašku. «Z zaŭtrašniaha dnia vy niesiacie piersanalnuju adkaznaść za stan zavoda», — źviarnuŭsia jon da Uładzimira Siamaški.