Budaŭniku nie zapłacili za pracu, tady jon spaliŭ dom, što pabudavaŭ. Mužčynu šukali 8 hod
43-hadovaha žychara Bresckaha rajona abvinavacili ŭ naŭmysnym źniščeńni čužoj majomaści, «ździejśnienym ahulnaniebiaśpiečnym sposabam, što paciahnuła pryčynieńnie škody ŭ bujnym pamiery».
Jak piša Hienprakuratura, abvinavačany ŭ 2015 hodzie ŭ adpaviednaści z damovaj uźvioŭ žyły dom i haspadarčuju pabudovu. Zaviaršyŭšy raboty pa budaŭnictvie, jon paprasiŭ raźličycca.
«Atrymany ad paciarpiełaha adkaz jaho nie zadavoliŭ — jon paviedamiŭ paciarpiełamu, što «praściej budzie dom spalić», — piša prakuratura.
Na nastupny dzień mužčyna i spaliŭ dom i haspadarčuju pabudovu.
Paśla hetaha mužčyna ŭciok, jaho šukali vosiem hadoŭ.
Jamu prysudzili pazbaŭleńnie voli na 3 hady 6 miesiacaŭ papraŭčaj kałonii va ŭmovach uzmocnienaha režymu.
Na karyść paciarpiełaha z abvinavačanaha spahnana suma ŭ pamiery 17 tysiač rubloŭ.
Pryhavor nie ŭstupiŭ u zakonnuju siłu, moža być abskardžany i apratestavany ŭ apielacyjnym paradku.