Lehiendarnyja časopisy «Kałambur» i «Odin doma» kančatkova zakryvajucca

Apošnija vypuski hetych vydańniaŭ, jakija praisnavali 27 hadoŭ, prapanoŭvałasia zamović na markietpłejsach, adnak na hety momant uvieś nakład užo raskupleny, paviedamlaje «Anłajnier».

Hod tamu, kab zachavać časopis i skaracić vydatki, «Kałambur» i «Odin doma» prybrali z padpisnoha katałoha. Ale, mabyć, hetyja miery nie dapamahli.

«Hetyja časopisy nazaŭždy zastanucca ŭ sercach našaj kamandy, a taksama ŭ pamiaci dziasiatkaŭ (i navat sotniaŭ) tysiač dziaciej i darosłych. «KA» i «Odi» nie złamaŭ ni rezka prychod internetu, ni šerah kryzisaŭ, i navat kavid nie zdoleŭ. Ale va ŭsiaho jość svoj termin», — havorycca ŭ paviedamleńni, jakoje adrasavali čytačam.

Pieršyja numary ruskamoŭnaha zabaŭlalnaha časopisa «Kałambur» pabačyli śviet u 1997 hodzie.

U im byli žarty, naviny i pop-kultura śvietu, komiksy, konkursy i kryžavanki. Startavy numar vydańnia vyjšaŭ nakładam 40 tysiač ekzemplaraŭ na 32 staronkach. U 2000-ja tyraž siahaŭ 220 tysiač. Paźniej u redakcyi staŭ vychodzić i časopis «Odin doma».

Sa zjaŭleńniem sacyjalnych sietak nakład časopisaŭ staŭ padać. U 2012 hodzie źmianiŭsia hałoŭny redaktar.

Vydaŭcom «Kałambura» i jaho dadatkaŭ vystupała kampanija «Rosčierk», jakoj naležyć i vydaviecki dom «Vita». «Rosčierk» — najbujniejšy dystrybjutar časopisaŭ u Biełarusi.

Kamientary da artykuła