Buduć paśmiarotna sudzić jašče adnaho ŭkrainca, jaki braŭ udzieł u spaleńni Chatyni

Hienieralny prakuror Andrej Švied nakiravaŭ u Viarchoŭny sud kryminalnuju spravu Kanstancina Smoŭskaha, jakoha abvinavačvajuć pavodle art. 127 KK (hienacyd), paviedamlaje pres-słužba Hienprakuratury.

Kiraŭnik śledčaj hrupy Hienprakuratury Valeryj Taŭkačoŭ zajaviŭ, što heta sprava «vyłučanaja ŭ asobnuju śpiecyjalnuju vytvorčaść […] pa fakcie hienacydu biełaruskaha naroda».

«Padčas rasśledavańnia sabranyja nieabvieržnyja dokazy, jakija paćviardžajuć vinu Smoŭskaha. Pratakoły dopytaŭ jahonych tavaryšaŭ pa słužbie, žycharoŭ viosak, jakija vyžyli, a taksama inšyja archiŭnyja dakumienty, u tym liku niamieckija», — skazaŭ Taŭkačoŭ.

Pavodle jaho, u kryminalnaj spravie 49 tamoŭ.

«Ustanoŭlena 26 epizodaŭ jaho złačynnaj dziejnaści ŭ składzie 118-ha achoŭnaha bataljona, kiraŭnikom jakoha jon źjaŭlaŭsia. U tym liku ŭstanoŭleny jahony ŭdzieł u źniščeńni žycharoŭ vioski Chatyń i inšych nasielenych punktaŭ», — adznačyŭ Taŭkačoŭ.

Kanstancin Smoŭski naradziŭsia ŭ 1889 hodzie ŭ Pałtaŭskaj hubierni (ciapierašniaj Čarnihaŭskaj vobłaści). Byŭ udzielnikam ukrainskaha nacyjanalnaha ruchu, va Uzbrojenych siłach Ukrainskaj Narodnaj Respubliki dasłužyŭsia da zvańnia pałkoŭnika. Z 1921 hoda žyŭ u emihracyi ŭ Polščy, słužyŭ u polskim vojsku.

Padčas Druhoj suśvietnaj vajny spačatku vajavaŭ u polskaj armii, zatym trapiŭ u niamiecki pałon i pahadziŭsia pierajści na bok hitleraŭskaj Hiermanii.

Paśla Druhoj suśvietnaj vajny Smoŭski emihravaŭ u ZŠA, dzie pamior u 1960 hodzie.

Udzieł Smoŭskaha ŭ spaleńni Chatyni ŭ składzie 118-ha bataljona šucmanšafta 22 sakavika 1943 hoda nie źjaŭlajecca tajamnicaj, pra heta było viadoma zadoŭha da rasśledavańnia Hienprakuratury.

Raniej łukašenkaŭski sud užo pravioŭ praces nad adnym z udzielnikaŭ spaleńnia Chatyni Uładzimiram Katrukom, prahnazavana ŭ chutkim tempie vyniesšy abvinavaŭčy prysud. 

Kamientary da artykuła