Jeŭrakamisarka: Pramiežkavy płan padtrymki reformaŭ u Biełarusi — na razhladzie ŭ Eštan
Pra heta Krystalina Hieorhijeva raskazała 24 lutaha na debatach u Jeŭraparłamiencie pa situacyi ŭ Biełarusi.
Na razhladzie viarchoŭnaha pradstaŭnika Jeŭraźviaza pa źniešnich suviaziach Ketryn Eštan znachodzicca sumiesny pramiežkavy płan padtrymki reformaŭ u Biełarusi, padrychtavany Jeŭrakamisijaj na zapyt Rady ES. Pra heta paviedamiła jeŭrakamisarka pa mižnarodnym supracoŭnictvie i humanitarnaj dapamozie Krystalina Hieorhijeva, vystupajučy 24 lutaha na debatach u Jeŭraparłamiencie pa situacyi ŭ Biełarusi.
Pavodle jaje słovaŭ, Eštan taksama ŭličyć vysnovy misii parłamienta ES, jakaja naviedaje Miensk 25-27 lutaha.
Hieorhijeva taksama zajaviła, što ES praciahnie dyjałoh ź Biełaruśsiu — nie tolki z uładami, ale i hramadzianskaj supolnaściu praz studencki i kulturnicki abmien i raźvićcio biznes-kantaktaŭ.
Kryścijan Vihienin, baŭharski deputat, kiraŭnik delehacyi Jeŭraparłamienta ŭ Jeŭraneście, u svaim vystupie nazvaŭ «nieprymalnaj» situacyju z parušeńniem u Biełarusi pravoŭ čałavieka, u pryvatnaści, pravoŭ nacyjanalnych mienšaściaŭ.
Pa słovach Vihienina, palityka zbližeńnia, jakuju ES raspačaŭ u dačynieńni da Biełarusi, niedastatkova vynikovaja. «Struktury ES — Rada, Kamisija i parłamient — pavinny raspracavać ahulnuju stratehiju, kab dapaŭniać vysiłki kožnaha; nam patrebnaja darožnaja karta, nie rekamiendacyi, a płan dziejańniaŭ dla padtrymki reformaŭ», — zajaviŭ baŭharski deputat.
Na dumku polskich deputataŭ, ES nieabchodna ŭviazać ekanamičnuju dapamohu z demakratyčnymi pieraŭtvareńniami ŭ Biełarusi, bolš za toje, ES pavinien zadziejničać usie mahčymyja instrumanty, kab pravy čałavieka ŭ krainie vykonvalisia.