BDIPČ: Na vybary nas sapraŭdy zaprašali, ale pozna

U Ministerstvie zamiežnych spraŭ paviedamili, što za vybarami 26 studzienia buduć nazirać 456 zamiežnych naziralnikaŭ z 49 krain. U tym liku zaprašeńnie było nakiravana i Biuro demakratyčnych instytutaŭ i pravoŭ čałavieka (BDIPČ) ABSIE. BDIPČ paćvierdziła, što ich sapraŭdy zaprašali, ale nie tady, kali heta było treba.

Fota ilustracyjnaje

U arhanizacyi zajavili, što ŭłady Biełarusi nakiravali zaprašeńnie z prapanovaj nazirać za vybarami 26 studzienia sa spaźnieńniem.

«Biełaruś abviaściła datu prezidenckich vybaraŭ niekalki miesiacaŭ tamu, i ŭłady dobra razumiejuć, što BDIPČ maje patrebu ŭ svoječasovym zaprašeńni dla nazirańnia za ŭsimi klučavymi aśpiektami vybaraŭ, uklučajučy padrychtoŭku da dnia vybaraŭ», — paviedamiła «Radyjo Svaboda» Kacia Andruš, pres— sakratarka Biuro demakratyčnych instytutaŭ i pravoŭ čałavieka.

Takim čynam, pavodle jaje, situacyja zastajecca takoj, jak była vyznačanaja ŭ supolnaj zajavie BDIPČ i Parłamienckaj asamblei ABSIE ad 9 studzienia. U joj arhanizacyi vykazali «hłybokaje škadavańnie» praz rašeńnie ŭładaŭ Biełarusi nie zaprašać dziaržavy — udzielnicy ABSIE nazirać za prezidenckimi vybarami ŭ krainie 26 studzienia. Heta, jak adznačałasia ŭ zajavie, «pieraškadžaje biesstarońniaj i niezaležnaj acency vybarčaha pracesu».

«Niahledziačy na toje, što BDIPČ nie moža nazirać za hetymi vybarami praz adsutnaść svoječasovaha zaprašeńnia, my praciahvajem uvažliva sačyć za padziejami ŭ Biełarusi z usich punktaŭ hledžańnia, achoplenych našym mandatam», — padkreśliła Kacia Andruš.

Taksama na zajavu MZS adreahavaŭ Ofis Śviatłany Cichanoŭskaj, jaki zaklikaŭ BDIPČ adchilić zaprašeńnie: 

«My nastojliva zaklikajem ABSIE/BDIPČ nie prymać hetaje zapoźnienaje i abmiežavanaje zaprašeńnie nazirać za hałasavańniem na tak zvanych prezidenckich vybarach 26 studzienia.

U 1994 hodzie ŭsie dziaržavy-ŭdzielnicy ABSIE dali BDIPČ mandat na praviadzieńnie doŭhaterminovaha nazirańnia za vybarami, pryznajučy, što vybary — heta nie adnadzionnaja padzieja. Jak užo zajaŭlała BDIPČ, nienakiravańnie svoječasovaha zaprašeńnia na nieabmiežavany termin nazirać za tak zvanymi vybarami 26 studzienia źjaŭlajecca parušeńniem abaviazacielstvaŭ Biełarusi ŭ ramkach ABSIE.

Kali padobnaje zapoźnienaje, abmiežavanaje pa terminach i jakoje nie źjaŭlajecca sapraŭdnym zaprašeńnie nazirać za hałasavańniem budzie pryniataje, heta stvoryć niebiaśpiečny precedent dla ŭsiaho rehijona ABSIE».

Kamientary da artykuła