Niaklajevu ŭ Barysavie padkłali śvińniu
Pramaja linija z paetam Uładzimiram Niaklajevym u Barysavie faktyčna była sarvanaja. Pra heta paviedamiła pres‑sakratar kampanii «Havary praŭdu!» Julija Rymašeŭskaja.
Praanansavanaja linija pavinna była adbycca 11 sakavika z 16.00 da 17.00 u redakcyi haziety «Borisovskije novosti». U 16.00 telefonnaja linija redakcyi pracavała, u 16.02 jaje praca była pierapynienaja. «Prablema była nie ŭ aparacie, a ŭ linii ATS. Na stancyi zajavili, što da 17.00 liniju adramantujuć, i sapraŭdy suviaź była adnoŭlena», — paviedamiła pres‑sakratar.
Razam z tym, pavodle jaje słoŭ, «ludzi, jakija mieli ŭpartaść, datelefanavalisia i paśla 17.00, niekatoryja taksama datelefanavalisia pa dadatkovych telefonach redakcyi i zmahli zadać svaje pytańni».
Jak paviedamlałasia raniej, Uładzimir Niaklajeŭ źjaŭlajecca inicyjataram hramadzianskaj kampanii «Havary praŭdu!».
U miežach kampanii «Kažy praŭdu!» płanujecca aktyŭnaje ŭzajemadziejańnie z vałanciorami pa ŭsioj krainie, jakija buduć pravodzić manitorynh infarmacyjnaj prastory. Pačaŭ pracavać sajt zapraudu.info, na jakim budut publikavacca kankretnyja fakty chłuśni, a taksama infarmacyja ab prablemach Minska i rehijonaŭ.
Pieršaj akcyjaj kampanii staŭ vypusk paštovak «Kažy praŭdu!» z prapanovaj da hramadzian napisać ab miascovych prablemach u Administracyju prezidenta.
Kampaniju padtrymali narodny paet Biełarusi Ryhor Baradulin, łaŭreat Dziaržaŭnaj premii Biełarusi paet Hienadź Buraŭkin, narodnaja artystka Biełarusi Zinaida Bandarenka, zasnavalnik fondu «Dzieci Čarnobyla» prafiesar Hienadź Hrušavy, akademik Radzim Harecki, łaŭreat mižnarodnaj premii Fondu Frydrycha Ebierta ŭ śfiery pravoŭ čałavieka Žanna Litvina, mižnarodny hrosmajstar pa šachmatach Viktar Kuprejčyk, pravaabaronca Taćciana Proćka.