NATO: My raźbili talibaŭ u Aŭhanistanie
Vojski NATO śćviardžajuć, što amal uščent źniščyli armiju talibaŭ na aŭhanskim poŭdni i ŭ chutkim časie adnoviać tam spakoj i paradak. Pry kancy minułaha tydnia samaloty, šrubaloty i artyleryja NATO raspravilisia ŭ kandaharskaj pustyni z amal 200 talibami.
Vojski NATO śćviardžajuć, što amal uščent źniščyli armiju talibaŭ na aŭhanskim poŭdni i ŭ chutkim časie adnoviać tam spakoj i paradak. U subotu i niadzielu samaloty, šrubaloty i artyleryja NATO raspravilisia ŭ kandaharskaj pustyni z amal 200 talibami.
Kamandavańnie NATO padrachavała, što ŭ vyniku aperacyi «Meduza», jakaja doŭžycca z 2 vieraśnia, u paŭdniovaaŭhanskich pravincyjach Kandahar i Helmand zahinuła bolš jak paŭtysiačy talibaŭ. Kali b hetaja infarmacyja spraŭdziłasia (čamu piarečać taliby), dyk heta b aznačała, što vojski NATO zdoleli ŭščent raźbić partyzanskuju armiju, jakaja dziejničaje na poŭdni i naličvaje kala tysiačy žaŭnieraŭ.
Mienavita jaje likvidacyja i vyhnańnie tych, chto zastaŭsia ŭ žyvych, z aŭhanskaha poŭdnia byli metami aperacyi «Meduza», u jakoj biaruć udzieł žaŭniery z ZŠA, Kanady i Vialikaj Brytanii. U bitvach na poŭdni zahinuła 19 brytancaŭ i 6 kanadcaŭ.
Samyja vialikija straty avijacyja NATO naniesła talibam u subotu i niadzielu, kali šrubaloty j letaki šukali ŭ pustyni i ŭ harach miescy raźmiaščeńnia lahieraŭ partyzanaŭ i paśla zasypali ich daždžom bombaŭ i rakietaŭ. Vidavočcy kažuć, što ŭ paniadziełak taliby pačali uciakać z rajonaŭ Pandžvai i Džary (pravincyja Kandahar), jakija da hetaha času znachodzilisia pad ich kantrolem, bo nia zdoleli akazać supracivu vojskam NATO.
Častka talibaŭ sprabuje prabracca ŭ susiednija paviety. Inšyja zakopvajuć zbroju i, chavajučysia siarod viaskoŭcaŭ, źbiahajuć jak uciekačy ŭ Kandahar – kałysku talibaŭ. U paniadziełak vojski NATO paśla bojki, u jakoj zahinuła zvyš 20 talibaŭ, adbili miastečka Harmzer u pravincyi Helmand, jakoje z červienia ŭžo šmatrazova pierachodziła z ruk aŭhanskaha ŭradu pad kantrol partyzanaŭ.
Kolki achviaraŭ siarod cyvilnych?
Nielha pravieryć paviedamleńniaŭ pra raźniu talibaŭ i razhrom ich paŭdniovaj armii. Taliby vokamhnienna chavajuć svaich zabitych žaŭnieraŭ, a žurnalistaŭ nie puskajuć u rajon baraćby. Vializnaja ličba achviaraŭ moža, miž inšym, pakazvać na toje, što ŭ bojkach zahinuła šmat cyvilnych asobaŭ.
Pierad pačatkam aperacyi «Meduza» vojski NATO raskidvali pa vioskach ulotki i raznosili paviedamleńni pra toje, kab viaskoŭcy kidali svaje vioski, jakija ŭ chutkim časie pieratvoracca ŭ pole bitvy. Šmat chto ź viaskoŭcaŭ nasamreč schavaŭsia ŭ Kandahary. Hubernatar Kandaharu Asadułach Chalid abvieściŭ u paniadziełak, što bojki ŭ chutkim časie zavieršacca i ŭciekačy zmohuć viarnucca ŭ svaje damy.
Adnak mnohija viaskoŭcy zastalisia ŭ svaich vioskach, kab pilnavać svaju majomaść. Jany vieryli, što navat ŭ zdareńni vajny jany zdolejuć uciačy ŭ susiedni Kandahar. Rajony Pandžvai i Džary lažać usiaho tolki za 30–40 km ad horadu.
Kamandavańnie NATO pryznaje, što bojki stalisia pryčynaj «peŭnych strataŭ siarod cyvilnych». Lekary z Kandaharu kolki dzion infarmujuć pra ranienych, jakich pryvoziać u špitali.
Bojki ŭ rajonie Pandžvai iduć z traŭnia, a taliby – miarkujučy, što cyvilnyja abjekty atakavać nia buduć, – achvotna chavajucca ad pieraśledujučych ich šrubalotaŭ siarod viaskoŭcaŭ, u ich damach, miačetach albo vinahradnikach. Bambardujučy ich, vojski NATO kožny raz spryčyniajucca da achviaraŭ siarod cyvilnych, što ŭ svaju čarhu nastrojvaje aŭhancaŭ suprać čužyncaŭ i dadaje talibam prychilnikaŭ i rekrutaŭ.
Zamiežnyja arhanizacyi Sensils i Christian Aid bjuć tryvohu, što z-za vajny i strašennaj zasuchi bolš za miljon aŭhancaŭ u Kandahary i Helmandzie, a taksama ŭ pravincyjach na zachadzie krainy buduć haładać uzimku. Z pryčyny zasuchi viaskoŭcy stracili ŭradžaj, a vajna ŭ Kandahary i Helmandzie stałasia pryčynaj taho, što tysiačy ludziej kačujuć u prymityŭnych, na chadu stvoranych lahierach.
Rasprava na pachavańni
Piać čałaviek zahinuli, a 30 byli paranienyja ŭ paniadziełak va ŭschodniaj pravincyi Chost u vyniku bombavaj sproby samahubstva, ździejśnienaj na pachavańni hubernatara pravincyi Paktyja Abduły Chakima Tanivala, jaki byŭ zabity dniom raniej padčas padobnaj sproby ŭ horadzie Hardez.
63-hadovy Tanival, navukoviec i siabra prezydenta Hamida Karzaja, šmat hadoŭ žyŭ u Aŭstralii. Jon viarnuŭsia ŭ Aŭhanistan u 2001 h., paśla źviaržeńnia talibaŭ, na haračyja prośby Karzaja. Jon byŭ ministram u aŭhanskim uradzie, a paśla na prośbu Karzaja zhadziŭsia zaniać pasadu hubernatara burnych pravincyjaŭ Chost i Paktyja, zasielenych puštunskim plemiem tanajaŭ, ziemlakoŭ Tanivala, pieršaha aŭhanskaha hubernatara, zabitaha talibami.
Napad na Tanivala i čarhovy napad na jaho pachovinach byli 47-j i 48-j bombavymi sprobami samahubstva, ździejśnienymi ŭ hetym hodzie ŭ Aŭhanistanie. Kamandavańnie vojskaŭ ZŠA abviaściła ŭ niadzielu, što navat u aŭhanskaj stalicy Kabule, što dahetul była aazaj spakoju, dziejničaje sietka terarystaŭ-kamikadze. U piatnicu adzin ź ich uzarvaŭsia bliz ambasady ZŠA, zabiŭšy pry hetym 16 čałaviek.