Pasoł Biełarusi ŭ Rasii źbirajecca naviedać akupavany Krym

Biełaruski pasoł u Rasii Juryj Sielivierstaŭ płanuje naviedać Krym, jaki byŭ anieksavany Rasijaj. Pra heta ŭ pačatku krasavika paviedamiŭ pradstaŭnik akupacyjnych uładaŭ paŭvostrava Andrej Łapacki, piša «Pozirk».

Sanatoryj «Biełaruś» u krymskim Mischory. Fota: Wikimedia Commons

Pa słovach Andreja Łapackaha, zaraz viadziecca padrychtoŭka da vizitu, ale kankretnyja daty pakul nie nazyvajucca. Jon adznačyŭ, što zadača pasła — heta raźvićcio supracoŭnictva nie tolki pamiž dziaržavami, ale i pamiž rehijonami.

Łapacki taksama padkreśliŭ, što ŭzajemadziejańnie pamiž Biełaruśsiu i Krymam, maŭlaŭ, prynosić nie tolki materyjalnuju karyść, ale i ŭmacoŭvaje «brackija adnosiny».

Sam Łapacki, jaki pachodzić ź Sievastopala, u 2022 hodzie staŭ pradstaŭnikom Kryma ŭ Biełarusi i zasnavaŭ kulturnuju arhanizacyju «Krymskaje ziamlactva». Akramia taho, u 2025 hodzie ŭ Biełarusi prajšli mierapryjemstvy, pryśviečanyja Krymu, z udziełam pradstaŭnikoŭ uładaŭ i biznesu hetaj akupavanaj terytoryi.

Raniej Alaksandr Łukašenka zajaŭlaŭ, što ličyć Krym rasijskim jak faktyčna, tak i jurydyčna paśla padziej 2014 hoda. Biełaruskija ŭłady taksama padtrymali dziejańni Rasii va Ukrainie ŭ 2022 hodzie i praciahvajuć supracoŭnictva z uładami na zaniatych terytoryjach.

Krym i Sievastopal byli dałučanyja da Rasii ŭ 2014 hodzie paśla praviadzieńnia refierendumu pad kantrolem rasijskich vojskaŭ. Adnak bolšaść krain śvietu hety krok nie pryznała. U mižnarodnych dakumientach, u tym liku AAN, hetyja terytoryi ličacca častkaj Ukrainy, jakaja znachodzicca pad časovaj akupacyjaj.

Kamientary da artykuła