U Viciebsku sprabujuć viarnuć u stroj redki samalot

Telehram-kanał «OtVinta | Aviacija Biełarusi» paviedamiŭ: pavodle infarmacyi krynic z avijacyjnaj śfiery, u aeraporcie Viciebska pačalisia raboty z samalotam Ił-62M, jaki raniej znachodziŭsia na zachoŭvańni. Takija vykarystoŭvajuć usiaho niekalki avijakampanij u śviecie, piša Blizko.by.

Hety bort (rehistracyjny numar EW-564TR) upieršyniu padniaŭsia ŭ nieba ŭ 1993 hodzie niezadoŭha da zakančeńnia vytvorčaści Ił-62. Niezvyčajnaja dla Biełarusi liŭreja tłumačycca jaho minułym apierataram — uradam Hambii (mieŭ bartavy numar C5-RTG). U žniŭni 2021 hoda bort byŭ pierahnany praz Džerbu (Tunis) u Viciebski aeraport, dzie zatym staŭ na zachoŭvańnie.

Rehistracyjny numar EW-564TR śviedčyć pra toje, što samalot ličycca ŭ fłocie biełaruskaj hruzavoj avijakampanii Rada Airlines. Jana była ŭtvoranaja ŭ 2015 hodzie.

Pavodle źviestak, havorka idzie mienavita pra adnaŭleńnie borta. Samalot płanujecca vykarystoŭvać samoj avijakampanijaj, a nie kamuści pieradavać.

Ił-62 — nadzvyčaj redki typ samalota ŭ sučasnaj ekspłuatacyi: u śviecie zastałosia ŭsiaho niekalki bartoŭ, jakija jašče lotajuć.

Siońnia takija samaloty možna sustreć litaralna ŭ adzinkavych apierataraŭ:

• Air Koryo (KNDR);
• dziaržaŭnyja struktury Rasii;
• Rada Airlines (Biełaruś).

Kamientary da artykuła