Łukašenka padpisaŭ zakon, jakim uvodzicca adkaznaść za «prapahandu» biaździetnaści i homaseksualizmu
Alaksandr Łukašenka padpisaŭ zakon «Ab źmianieńni kodeksaŭ pa pytańniach administracyjnaj adkaznaści». Heta pieršaje bujnoje abnaŭleńnie hetych kodeksaŭ z 2021 hoda, kali va ŭładaŭ źjaviłasia pilnaja patreba ich źmianić dla bolš efiektyŭnaha praviadzieńnia palityčnych represij.
Zdymak ilustracyjny. Fota: «Naša Niva»
Ciapierašnija źmieny pašyrajuć pieralik administracyjnych pravaparušeńniaŭ. Siarod novaha — adkaznaść za niezakonnyja apieracyi z kryptaaktyvami (tokienami), parušeńni ŭ śfiery jakaści i pakryćcia pasłuh mabilnaj suviazi, a taksama za parušeńni pry nabyćci słužbovych aŭtamabilaŭ.
Asobny błok dakumienta tyčycca tak zvanych «tradycyjnych kaštoŭnaściaŭ». Uvodziacca štrafy sumaj da 900 rubloŭ za prapahandu homaseksualnych adnosin, źmieny połu, piedafilii i biaździetnaści. Kali takija dziejańni ździajśniajucca ŭ dačynieńni da niepaŭnaletnich, sankcyi ŭzmacniajucca i mohuć uklučać štraf da 1350 rubloŭ abo administracyjny aryšt.
Taksama zakon uzmacniaje miery prafiłaktyki pravaparušeńniaŭ siarod padletkaŭ i ŭvodzić asobnyja pracedury vychavaŭčaha ŭździejańnia.
Pašyrajucca i mahčymaści vyzvaleńnia ad adkaznaści — naprykład, pry dobraachvotnym pakryćci škody navakolnamu asiarodździu abo vypraŭleńni pamyłak u dakumientach.
Spraščajecca administracyjny praces: skarhi možna budzie padavać u elektronnym vyhladzie, a niekatoryja spravy razhladać biez asabistaha ŭdziełu čałavieka pa jaho chadajnictvie.
Usiaho źmianiajecca kala 150 artykułaŭ kodeksaŭ, kab, jak zajaŭlajecca, pryvieści ich u adpaviednaść ź inšymi zakonami i praktykaj prymianieńnia.
Čytajcie taksama:
U Biełarusi buduć štrafavać za prapahandu homaseksualnych adnosin, biaździetnaści i źmieny połu
U Biełarusi ŭviaduć adkaznaść za hiej-prapahandu. Štraf — da 800 rubloŭ