Samy bahaty ŭkrainiec kupiŭ kvateru ŭ Manaka za $550 miljonaŭ. Heta rekordnaja ździełka ŭ historyi
21 pakoj, pieršaja bierahavaja linija, svoj basiejn i terasy.
Dom Le Renzo u Manaka. Fota: ahienctvy nieruchomaści
Miljarder Rynat Achmietaŭ, samy bahaty čałaviek Ukrainy, nabyŭ raskošnuju piacipaviarchovuju kvateru ŭ samym prestyžnym novym kompleksie Manaka za 471 miljon jeŭra (554 miljony dalaraŭ). Heta samaja darahaja ździełka z žyłoj nieruchomaściu ŭ historyi, paviedamlaje Bloomberg.
Kvatera na 21 pakoj znachodzicca na pieršaj bierahavoj linii ŭ kompleksie Mareterra ŭ budynku Le Renzo. Jaje płošča — kala 2500 kvadratnych mietraŭ, nie ličačy bałkonaŭ i teras ź vidam na Mižziemnaje mora. Jość taksama pryvatny basiejn, džakuzi i jak minimum vosiem parkovačnych miescaŭ.
Hety novy kompleks byŭ uračysta adkryty pryncam Albiertam II u 2024 hodzie i pryciahnuŭ zvyšbahatych inviestaraŭ z usiaho śvietu.
Kvatera nabytaja chołdynhavaj kampanijaj Achmietava System Capital Management (SCM). U prajekt Le Renzo Achmietaŭ inviestavaŭ jašče ŭ 2021 hodzie.
Rynat Achmietaŭ. Fota: Football.ua
Padrabiaznaści ździełki, jakaja była zavieršana ŭ 2024 hodzie, stali viadomyja tolki ciapier.
Ahučanaja cana robić hetuju kuplu samaj darahoj viadomaj ździełkaj u historyi.
Čysty kapitał 59‑hadovaha Achmietava składaje bolš za 7 miljardaŭ dalaraŭ. Jon zarabiŭ na inviestycyjach u mietałurhiju, zdabyču karysnych vykapniaŭ i enierhietyku, a taksama ŭ nieruchomaść.