Siarod pieradadzienych Polščaj Biełarusi — taksist z «Paspalitaha rušeńnia» Uładzisłaŭ Nadziejka

Dziaržaŭnaje ahienctva BiełTA apublikavała repartaž z sustrečy na miažy łukašenkaŭskich i rasijskich špijonaŭ, pieradadzienych Polščaj u Biełaruś u ramkach siońniašniaha abmienu. Pry hetym byli nazvanyja jašče dva proźviščy, jakija raniej nie hučali.

Zatrymany Uładzisłaŭ Nadziejka. Fota ź jaho vydalenaj staronki ŭ Adnakłaśnikach

Siarod tych, chto byŭ pieradadzieny z Polščy ŭ Biełaruś, akramia raniej viadomych vysokapastaŭlenaha małdaŭskaha śpiecsłužbista i adnačasova biełaruskaha špijona Alaksandra Bełana i rasijan Alaksandra Buciahina dy Niny Papovaj, nazvany taksama biełarus Uładzisłaŭ Nadziejka. Jon pracavaŭ taksistam u Biełastoku, byŭ udzielnikam Biełastockaj charuhvy «Paspalitaha rušeńnia» i adnačasova zajmaŭsia špijonskaj dziejnaściu.

Što tyčycca ludziej, pieradadzienych ź Biełarusi ŭ Polšču, to akramia raniej užo viadomych Andreja Pačobuta i Hžehaža Havieła, prahučała imia Tomaša Biarozy — hramadzianina Polščy, jaki byŭ žanaty ź biełaruskaj i žyŭ ź siamjoj u Kobrynie. U 2024 hodzie jon byŭ asudžany pa č.1 art. 358‑1 KK (ahienturnaja dziejnaść) i art. 358 (špijanaž) na 14 hadoŭ u kałonii ŭzmocnienaha režymu. 

Tomaš Biaroza

Cikava, adnak, što pierad hetym premjer-ministr Polščy Donald Tusk paviedamiŭ, što razam z Pačobutam i Haviełam vyzvaleny nie nazvany im hramadzianin Biełarusi, jaki supracoŭničaŭ z polskimi śpiecsłužbami. Pad heta akreśleńnie padychodziŭ Dźmitryj Paźniakoŭ, jakoha sudzili pa adnoj spravie ź Biarozam, ale nie sam Biaroza. 

Kamientary da artykuła