U Minsku likvidujuć Nacyjanalny centr sučasnaha mastactva

U Minsku płanujuć likvidavać Nacyjanalny centr sučasnaha mastactva — dziaržaŭnuju kulturnuju ŭstanovu, jakaja pracavała bolš za dziesiać hadoŭ i była adnoj z klučavych placovak sučasnaha mastactva ŭ krainie, piša Reform.news.

Fota: sacsietki NCSM

Spačatku ŭ instahramie instytucyi źjaviłasia paviedamleńnie pra «apošniuju» akcyju Noč muziejaŭ, jakuju ładzić ustanova. Dźvie krynicy z kulturnickich kołaŭ paćvierdzili Reform.news, što centr praciahnie pracu tolki da vosieni. Paśla hetaha kala 50 supracoŭnikaŭ mohuć stracić pracu.

Častku majomaści ŭstanovy pieraraźmiarkujuć: fondy NCSM i placoŭka na vulicy Jakuba Kołasa buduć pieradadzieny Nacyjanalnamu mastackamu muzieju, a pamiaškańni na vulicy Niakrasava — Biełaruskaj dziaržaŭnaj akademii mastactvaŭ.

U nieaficyjnych kamientaryjach adznačajecca, što zakryćcio moža być źviazana ź pieraraźmierkavańniem kulturnych płoščaŭ i ŭpłyvam novaha kiraŭnika Sajuza mastakoŭ Andreja Vasileŭskaha, a taksama zacikaŭlenaściu asobnych struktur u budynkach i resursach centra.

Sam Nacyjanalny centr sučasnaha mastactva byŭ stvorany ŭ 2015 hodzie šlacham abjadnańnia dźviuch papiarednich instytucyj: Tvorčych Majsterniaŭ «Centr Sučasnych Mastactvaŭ» i dziaržaŭnaj ustanovy «Muziej sučasnaha vyjaŭlenčaha mastactva». Za čas isnavańnia jon staŭ važnaj płatformaj dla sučasnaha mastactva ŭ Biełarusi.

Centr zajmaŭsia padtrymkaj ekśpierymientalnych prajektaŭ u vyjaŭlenčym, teatralnym i muzyčnym mastactvie, pracavaŭ z maładymi mastakami i kuratarami, a taksama ŭdzielničaŭ u mižnarodnych prajektach, u tym liku ŭ arhanizacyi nacyjanalnych paviljonaŭ Biełarusi na Vieniecyjanskim bijenale i inšych bujnych art-padziejach.

Kamientary da artykuła