Žonka zahinułaha biełaruskaha dobraachvotnika patrabuje źmianić zakon pra zvańnie «Hieroj Ukrainy», jakim nielha ŭznaharodzić zamiežnikaŭ
Udava bajca pałka Kalinoŭskaha Alaksieja Łazarava źviarnułasia da prezidenta Ukrainy Uładzimira Zialenskaha z zaklikam dać zamiežnym dobraachvotnikam prava atrymlivać najvyšejšuju dziaržaŭnuju ŭznaharodu Ukrainy. Jana apublikavała adpaviednuju pietycyju, jakuju prosić padpisać.
Žančyna patrabuje ad Viarchoŭnaj Rady i Uładzimira Zialenskaha likvidavać zakanadaŭčuju niaroŭnaść, jakaja dazvalaje prysvojvać zvańnie Hieroja Ukrainy vyklučna hramadzianam krainy, pakidajučy za bortam zamiežnikaŭ, jakija addali žyćcio za jaje niezaležnaść krainy.
Na staroncy svajho zahinułaha muža ŭ X žančyna apublikavała emacyjny zvarot.
«Moj muž nikoli nie čakaŭ udziačnaści. Jon byŭ idejnym, paśladoŭnym u svaich pohladach, ale jaho zaŭsiody chvalavała niespraviadlivaść. Ja chaču damahčysia taho, kab u zamiežnych dobraachvotnikaŭ, jakija vajujuć za niezaležnaść Ukrainy z 2014 hoda, było prava atrymlivać zvańnie «Hieroja Ukrainy».
Bo jany hetaha zasłuhoŭvajuć. Heta nie pra asablivaje staŭleńnie, heta pra roŭnaść u hetym pytańni. Zakonaprajekt ab źmienach u zakanadaŭstvie byŭ uniesieny jašče ŭ 2022 hodzie. Ale jon tak i zastaŭsia biez uvahi», — piša jana.
Jana dadaje, što dla jaje niama značeńnia, ci daduć jejnamu mužu zvańnie «Hieroja Ukrainy» — «jamu, napeŭna, i było b pryjemna, ale heta nikoli nie było jaho metaj».
Pavodle słoŭ žančyny, zamiežniki mahli b žyć svaim lepšym žyćciom u inšych krainach, ale abrali baraćbu za spraviadlivaść i praŭdu, i mnohija — canoju ŭłasnaha žyćcia. Ale jany abrali zmahacca. I mnohija addali za heta ŭsio, bo addali svajo žyćcio.
Pietycyju, jakuju apublikavali siońnia, padpisaŭ 91 čałaviek ź nieabchodnych 25 tysiač.