Maryn Le Pen zmoža ŭdzielničać u vybarach prezidenta Francyi

Apielacyjny sud Paryža paćvierdziŭ vinu lidarki parłamienckaj frakcyi francuzskaj ultrapravaj partyi «Nacyjanalnaje abjadnańnie» Maryn Le Pen u niepravamiernym vykarystańni srodkaŭ Jeŭrapiejskaha parłamienta, adnak źmiakčyŭ joj nakładzienaje raniej pakarańnie. Heta moža dazvolić palityku ŭdzielničać u prezidenckich vybarach Francyi ŭ 2027 hodzie, piša Reuters.

Maryn Le Pen. Fota: AP Photo/Aurelien Morissard

Sud skaraciŭ dla Maryn Le Pen termin zabarony zajmać vybarnyja pasady ź piaci hadoŭ da 45 miesiacaŭ, ź jakich 30 miesiacaŭ pryznačanyja ŭmoŭna. Takim čynam, faktyčnaja zabarona składaje 15 miesiacaŭ, i farmalna Le Pen zmoža bałatavacca na prezidenckich vybarach.

Termin pazbaŭleńnia voli taksama byŭ skaročany — z čatyroch da troch hadoŭ. Dva hady pryznačanyja ŭmoŭna, a jašče adzin hod palityk pavinna adbyć pad chatnim aryštam z elektronnym branzaletam. Raniej Lo Pen zajaŭlała, što nie budzie ŭdzielničać u vybarach, kali sud pakinie ŭ sile takoje pakarańnie.

Sud paćvierdziŭ vysnovy, zroblenyja jašče ŭ 2025 hodzie: Maryn Le Pen i jašče vosiem jeŭradeputataŭ ad «Nacyjanalnaha abjadnańnia» niepravamierna vykarystoŭvali bolš za čatyry miljony jeŭra srodkaŭ Jeŭraparłamienta. Pavodle materyjałaŭ śledstva, u 2004—2016 hadach hetyja hrošy išli na apłatu pracy supracoŭnikaŭ partyi zamiest pamočnikaŭ jeŭradeputataŭ.

Paśla abviaščeńnia rašeńnia suda Le Pen pakinuła budynak biez kamientaroŭ. Raniej jana nazyvała prysud palityčna matyvavanym. U vypadku jaje admovy ad udziełu ŭ vybarach kandydatam ad «Nacyjanalnaha abjadnańnia» moža stać 30‑hadovy staršynia partyi Žardan Bardeła.

Kamientary da artykuła