Maci prapahandysta Ihara Tura Łukašenka daŭ miedal Francyska Skaryny
30 červienia Alaksandr Łukašenka ŭručaŭ dziaržaŭnyja ŭznaharody, i siarod uznaharodžanych była i Iryna Tur — dyrektarka Doma kultury ŭ Lidzie. Heta maci adnaho z klučavych prapahandystaŭ łukašenkaŭskaha režymu Ihara Tura, a ŭšanavali jaje miedalom Francyska Skaryny, piša «Hrodzienskaja praŭda».
Fota: «Hrodzienskaja praŭda»
Iryna Tur rodam ź vioski ŭ Miadzielskim rajonie, skončyła chareahrafičnaje adździaleńnie kulturna-aśvietnickaha vučylišča ŭ Minsku (ciapier Minski dziaržaŭny kaledž mastactvaŭ). Paśla pracavała mastackaj kiraŭnicaj u viaskovych damach kultury, režysiorkaj, a paśla i dyrektarkaj Lidskaha rajonnaha navukova-mietadyčnaha centra. Dom kultury ŭ Lidzie jana ŭznačalvaje ŭžo 20 hadoŭ, tut ža zahadvaje dziciačym adździełam i jaje dačka Volha Kapłun.
Zhadvaje jana ŭ razmovie z abłasnymi prapahandystami i pra svajho znakamitaha syna, śćviardžajučy, što jahonyja «maralnyja kaštoŭnaści», jakija maje mahčymaść nazirać praz televizar usia kraina — vynik siamiejnaha vychavańnia:
«Miedala Francyska Skaryny syn byŭ udastojeny na 5 hadoŭ raniej za mianie. I bačna, što heta jaho vielmi biantežyć. Ale, dumaju, što jon, sam budučy baćkam, razumieje: dla kožnaha z baćkoŭ dasiahnieńni dziaciej daražejšyja za ich ułasnyja ŭznaharody. Hałoŭnaje — što našy siamiejnyja tradycyi jon pieranios u svaju siamju, a pryščeplenyja maralnyja kaštoŭnaści — u prafiesijnuju dziejnaść i adnosiny z atačeńniem».
Siamja Turaŭ. Fota: «Hrodzienskaja praŭda»
Baćka Ihara Tura, Piatro Tur, u svoj čas skončyŭ avijacyjnaje techničnaje vučylišča cyvilnaj avijacyi, a paśla «zajmaŭ surjoznuju pasadu na horadaŭtvaralnym pradpryjemstvie». U minułym hodzie paviedamlałasia, što jon pracuje inžynieram u filijale «Lidskija elektryčnyja sietki».
Čytajcie taksama:
Jak prapahandyst Ihar Tur staŭ lubimčykam Łukašenki i kolki zarabiŭ u 2020-m
Mama prapahandysta Ihara Tura pieraabirajecca ŭ lidskija deputaty ad «Biełaj Rusi»