Ceny na pšanicu na suśvietnym rynku rezka ŭpali

Niečakany spad cen na pšanicu adbyŭsia na suśvietnych zbožžavych rynkach. Bujniejšaja Čykahskaja tavarnaja birža adkryłasia va ŭmovach skaračeńnia cany bušala na 1,5 pracenta da $5,785.

«Suśvietny rynak pšanicy apynuŭsia ciapier va ŭładzie śpiekulantaŭ, jakija sprabujuć jaho „razhajdać“ u atmaśfiery narastańnia niapeŭnaści, z adnaho boku, u suviazi z vyklučna haračym nadvorjem u Rasii, inšych krainach Uschodniaj Jeŭropy i Kazachstanie, a z druhoha — praliŭnym daždžom ŭ Kanadzie», — zajaviŭ karespandentu ITAR-TASS pradstaŭnik Suśvietnaha savieta pa zbožžy, što znachodzicca ŭ Łondanie. «Stvarajecca ŭražańnie, što va ŭmovach mahčymaj hibieli častki ŭradžaju va Uschodniaj Jeŭropie i Paŭnočnaj Amierycy śpiekulanty sprabujuć vyklikać rezkija vahańni cen na zbožžavyja, i ŭ pieršuju čarhu pšanicu, i tym samym atrymać bujny prybytak na forvardnych kantraktach», — padkreśliŭ jon.

U suviazi ź niebyvałaj śpiokaj u Rasii, Ukrainie i Kazachstanie i mocnymi daždžami ŭ Kanadzie z 9 lipienia suśvietnyja ceny na pšanicu vyraśli na 35 pracentaŭ. U vyniku da minułaha čaćviarha jany vyjšli na 7-miesiačny maksimum. Adnak u piatnicu adbyłosia ich asłableńnie, a siońnia jany jašče bolš źnizilisia. Śpiecyjalisty pakul jašče nie mohuć dakładna rastłumačyć pryčyny ŭźniknieńnia depresiŭnaj tendencyi. Miž tym, zhodna z šeraham dziełavych krynic, bujniejšyja śpiekulatyŭnyja fondy pačali ciapier ihrać na źnižeńnie cen na pšanicu.

Kamientary da artykuła