Los kryminalnaj spravy Bankaŭskasa nieviadomy

U Hienieralnaj prakuratury Biełarusi asprečyli infarmacyju ab tym, što materyjały spravy Bankaŭskasa pieradadzienyja ŭ hetaje viedamstva.

Pa-raniejšamu nieviadomy los kryminalnaj spravy, raspačataj u Biełarusi ŭ dačynieńni da kiraŭnika konnaj palicyi Vilniusa Łajmonasa Bankaŭskasa.

U Hienieralnaj prakuratury Biełarusi asprečyli infarmacyju litoŭskich ŚMI ab tym, što materyjały spravy Bankaŭskasa niby pieradadzienyja ŭ heta viedamstva. Ničoha nieviadoma ab kryminalnaj spravie Bankaŭskasa i ŭ Hienprakuratury Litvy, a ŭ Kamitecie dziaržbiaśpieki Biełarusi situacyju z vyzvaleńniem vysokapastaŭlenaha litoŭskaha palicejskaha pa-raniejšamu nie kamientujuć.

Bankaŭskas byŭ zatrymany 16 žniŭnia ŭ Ašmianach (Hrodzienskaja vobłaść) zhodna z artykułam 108 Kryminalna-pracesualnaha kodeksa Biełarusi (zatrymańnie pa niepasredna ŭźnikłym padazreńni va ŭčynieńni złačynstva). U jaho znajšli 45,5 hrama amfietaminu. Pavodle padazreńnia ŭ kantrabandzie (art. 228 Kryminalnaha kodeksa Biełarusi) Bankaŭskas byŭ źmieščany ŭ śledčy izalatar Hrodna. 19 žniŭnia termin utrymańnia litoŭca pad vartaj byŭ pradoŭžany da 10 sutak, a materyjały jaho kryminalnaj spravy pieradadzieny va ŭpraŭleńnie KDB pa Hrodzienskaj vobłaści.

Svajaki zatrymanaha śćviardžali, što narkotyki jamu padkinuli, a niekatoryja litoŭskija ŚMI paviedamili pra nibyta viarboŭku litoŭskaha palicejskaha biełaruskimi śpiecsłužbami. U KDB Biełarusi hetuju infarmacyju admaŭlali.

25 žniŭnia Centr infarmacyi i hramadskich suviaziaŭ (CIHS) KDB Biełarusi aficyjna paviedamiŭ pra vyzvaleńnie Bankaŭskasa. «Hramadzianin Litvy Łajmonas Bankaŭskas vyzvaleny z-pad varty śledčym terytaryjalnaha orhana KDB Respubliki Biełaruś u adpaviednaści z č. 4 art. 119 Kryminalna-pracesualnaha kodeksa Respubliki Biełaruś pa ŭzhadnieńni z prakuraturaj Hrodzienskaj vobłaści», — paviedamlałasia ŭ pres-relizie, raźmieščanym na sajcie KDB.

Čaćviortaja častka artykuła 119 KPK abviaščaje: «Miera strymańnia admianiajecca, kali ŭ joj źnikaje dalejšaja nieabchodnaść, abo źmianiajecca na bolš strohuju ci bolš miakkuju, kali heta vyklikajecca abstavinami kryminalnaj spravy».

Kamientary da artykuła