Na kinafiestyvali «Mahnifikat» źniaty z pakazu dakumientalny film Alaksieja Šeina «Chrystos zabaronieny»

Na VI mižnarodnym katalickim fiestyvali chryścijanskich dakumientalnych filmaŭ i teleprahram «Mahnifikat-2010», jaki adkryŭsia ŭ Minsku 7 vieraśnia, źniaty z pakazu dakumientalna-publicystyčny film Alaksieja Šeina «Chrystos zabaronieny».

Šein paviedamiŭ, što stužku płanavałasia pakazać 9 vieraśnia ŭ 17.30 u Hłybockim rajonnym domie kultury (Viciebskaja vobłaść). Adnak, kali aŭtar filma pryjechaŭ u Hłybokaje dla ŭdziełu ŭ prezientacyi svajoj raboty, u kiraŭnictvie fiestyvalu jamu paviedamili, što stužka nie moža być pakazanaja, pakolki atrymała admoŭnuju acenku pa vynikach ekśpiertyzy ŭ Aparacie ŭpaŭnavažanaha pa spravach relihij i nacyjanalnaściaŭ.

Premjera 52-chvilinnaj stužki pra supraćstajańnie savieckaj sistemy i jevanhielskich viernikaŭ u BSSR, adbyłasia ŭ Minsku 26 studzienia. U film uvajšli śviedčańni chryścijan, jakija pieražyli savieckija kancłahiery i turmy; unikalnaja antychryścijanskaja kinachronika časoŭ BSSR i intervju ź biełaruskimi historykami. Stužka raspaviadaje pra ludziej, jakija vybirali pamiž žyćciom i śmierciu. Na dumku Alaksieja Šeina, mužnaść šmatlikich viernikaŭ, jakija žyli zhodna ź Biblijaj i Jevanhiellem, nie skarylisia savieckamu tatalitaryzmu, śviedčyć pra najaŭnaść u paślavajennaj Biełarusi šyrokaha dysidenckaha ruchu ŭ pieršapačatkovym sensie hetaha słova, pakolki dysidentami ŭ XVII stahodździ ŭ Anhlii nazyvali jevanhielskich chryścijan, nie zhodnych z peŭnym relihijnym i hramadskim ładam.

«Zabarona na pakaz majho filma śviedčyć pra toje, što biełaruskija ŭłady imknucca kantralavać usie śfiery žyćcia hramadstva», — padkreśliŭ Šein. Jon miarkuje, što viadomaja biblejskaja cytata «Nie bojciesia!», jakuju ŭ pieryjad baraćby z kamunizmam časta paŭtaraŭ papa Jan Pavieł II, «vielmi aktualnaja dla ciapierašniaj Biełarusi».

Jak paviedamiŭ Alaksiej Šein, film demanstravaŭsia ŭ šerahu pratestanckich abščyn krainy. Pavodle jaho słoŭ, atrymanyja zaprašeńni na pakaz stužki ŭ Brusieli (Bielhija) i Muziei hienacydu ŭ Vilniusie (Litva).

Alaksiej Šein źjaŭlajecca adnym z sustaršyniaŭ arhkamiteta pa stvareńni partyi «Biełaruskaja chryścijanskaja demakratyja».

Kamientary da artykuła