Mieninhit — nie prastuda, choć i moža pad jaje maskiravacca

Tradycyjna padčas siezona prastudy i hrypu aktyvizujecca jašče adno vielmi hroznaje zachvorvańnie — mieninhakokavaja infiekcyja.

Niebiaśpieka mieninhakokavaj infiekcyi zaklučajecca ŭ tym, što zachvorvańnie moža raźvicca ŭ čałavieka ŭ ličanyja hadziny, pryčym pry małankavych formach mieninhitu vyratavać chvoraha nie zaŭsiody ŭdajecca.

Varta viedać, što ŭzbudžalnik mieninhakokavaj infiekcyi pastajanna cyrkuluje siarod roznych uzrostavych hrup nasielnictva, ale najbolšuju epidemičnuju niebiaśpieku dla navakolnych ujaŭlajuć bakteryjanośbity. Čaściej za ŭsio nośbitami źjaŭlajucca darosłyja, navat nie padazrajučy ab hetym, a chvarejuć pieravažna dzieci. Asabliva schilnyja da inficyjavańnia maleńkija dzieci va ŭzroście da 5 hadoŭ z asłablenym imunitetam. Raspaŭsiudžvańnie ŭzbudžalnika adbyvajecca pavietrana-kropielnym šlacham pry kašli, čchańni i navat pry zvyčajnaj razmovie.

Vosieńniu i viasnoj kolkaść nośbitaŭ uzrastaje ŭ 4–6 razoŭ.

Mieninhity mohuć vyklikacca samymi roznymi ŭzbudžalnikami: mieninhakokam, pnieŭmakokam, hiemafilnaj pałačkaj i navat virusam prostaha hierpiesu, jaki zvyčajna paškodžvaje ślizistuju abałonku vusnaŭ. Kavarstva infiekcyi zaklučajecca ŭ tym, što pieršyja kliničnyja prajavy zachvorvańnia mohuć nahadvać prastudu ci hryp. Najbolš raspaŭsiudžanaj formaj infiekcyi źjaŭlajecca nazafarynhit, kali ŭ chvoraha zapalajecca zadniaja ścienka hłotki, adznačajecca niaznačnaje pavyšeńnie tempieratury cieła, hałaŭny bol, piaršeńnie ŭ horle, zakładzienaść nosa i nasmark. Na hetym etapie čaściej za ŭsio pacyjentam stavicca dyjahnaz «vostraje reśpiratornaje zachvorvańnie». Adnak niapravilnaja i niesvoječasovaja dyjahnostyka moža dalej pryvieści da zapaleńnia mazhavych abałonak.

Dla hienieralizavanych formaŭ mieninhakokavaj infiekcyi charakternaje vostraje imklivaje raźvićcio zachvorvańnia na fonie poŭnaha zdaroŭja. Zachvorvańnie pačynajecca raptoŭna. Tak, dzicia moža lehčy spać absalutna zdarovym, a nočču niečakana stanovicca niespakojnym, adčuvaje myšačnuju słabaść, kapryzić. Kali dzicia ŭžo razmaŭlaje, to abaviazkova paskardzicca baćkam na mocny hałaŭny bol, ad jakoha nielha budzie vyratavacca zvyčajnymi abiazbolvalnymi srodkami. Na praciahu hadziny tempieratura padnimajecca da 39–40 hradusaŭ, a praz 5–6 hadzin pačynajucca vanity, jakija nie prynosiać palohki chvoramu. Ale samy hrozny simptom, jaki ni ŭ jakim razie nielha prapuścić — heta źjaŭleńnie sypu: spačatku na ciele źjaŭlajucca bledna-ružovyja zorački, ale dalej hiemarahičny syp budzie «razrastacca». Jak tolki na ciele źjavilisia hiemarahičnyja vysypańni, treba abaviazkova paŭtorna vyklikać doktara, pakolki pieršasny dyjahnaz hučyć, chutčej za ŭsio, jak «vostraje reśpiratornaje zachvorvańnie» i nie adpaviadaje rečaisnaści. Takaja forma mieninhitu niebiaśpiečnaja tym, što ŭ chvoraha moža raźvicca infiekcyjna-taksičny šok. Atručeńnie praduktami raspadu mieninhakokaŭ pryvodzić da parušeńnia sardečna-sasudzistaj dziejnaści i dychańnia. Šok stanovicca pryčynaj śmierci ŭ 5–10 pracentaŭ chvorych, tamu čym raniej baćki źviernucca pa miedycynskuju dapamohu i čym raniej budzie pastaŭleny pravilny dyjahnaz, tym bolš šancaŭ na vyratavańnie ŭ chvoraha. Ale ŭ lubym vypadku dziciaci spatrebicca špitalizacyja.

Heta treba viedać usim:

— baćki dziciaci pavinny pamiatać, što ŭ vypadku prastudnych prajaŭ jany mohuć źjavicca krynicaj zachvorvańnia dla svajho dziciaci, tamu pry źjaŭleńni pieršych simptomaŭ zachvorvańnia nieabchodna karystacca marlevymi maskami;

— kab nie padchapić nazafarynhit, treba pazbaŭlacca ad chraničnych zachvorvańniaŭ nasahłotki — farynhitu, tanzilitu i łarynhitu;

— kab paźbiehnuć inficyjavańnia, rekamiendujecca bolš hulać ź dziećmi na adkrytym pavietry i paźbiahać u prastudny siezon pajezdak u hramadskim transparcie, a taksama nie znachodzicca doŭhi čas u miescach ź vialikaj kancentracyjaj ludziej (kramach, rynkach, u teatrach i hetak dalej);

— pakolki ŭzbudžalnik niaŭstojlivy ŭ źniešnim asiarodździ, aktualnymi źjaŭlajucca režymy pravietryvańnia, vilhotnaja ŭborka z prymianieńniem dezynfiektantaŭ, vykarystańnie bakterycydnych lampaŭ dla abiezzaražvańnia pavietra;

— vyražanymi simptomami ahulnaj intaksikacyi arhanizma źjaŭlajucca vysokaja tempieratura cieła, dryžyki, bol u vočnych jabłykach, myšcach cieła, skavanaść šyjnych myšcaŭ, hałaŭny bol, młosnaść, vanity;

— u vypadku źjaŭleńnia pieršych simptomaŭ, charakternych dla mieninhakokavaj infiekcyi, nieabchodna nieadkładna vyklikać «chutkuju dapamohu»;

— kali miedycynskim rabotnikam prapanavanaja špitalizacyja, ni ŭ jakim razie nie admaŭlajciesia ad jaje, bo ad hetaha moža zaležać žyćcio vašaha dziciaci!

Kamientary da artykuła