Chryścina Šacikava ŭ balnicy z unutranymi paškodžańniami
Mahiloŭskuju aktyvistku zavieźli tudy z Akreścina.
Mahiloŭskaja aktyvistka Chryścina Šacikava była zatrymanaja 19 śniežnia kala 23.30 ŭ arcy, pa jakoj možna prajści ad płoščy Niezaležnaści da vulicy Leninhradskaj — užo paśla razhonu akcyi. Šacikava kaža, što jana ź siabrami sprabavała baranić ludziej ad amonaŭskaj začystki.
Jana raspaviała karespandentu «NN», što ŭ milicejskim aŭtobusie pačała źbirać proźviščy zatrymanych i paviedamlać ich pravaabaroncam pa telefonie, jaki admoviłasia addać. Za heta jaje źbili amonaŭcy ŭ dvary Kastryčnickaha RUUS. Paśla ŭ samim RUUSie, raskazała Chryścina, padčas pierapisvańnia źviestak i vobšuku zatrymanych, jana aburyłasia. Za heta jaje vyvałakli ŭ kalidor i źbili nahami i dušyli. Rabiŭ heta, pavodle jaje słovaŭ, supracoŭnik RUUS V. A.
Nijakich sudovych dziejańniaŭ suprać Šacikavaj nie pravodziłasia.
Paśla pierapisvańnia źviestak partyju viaźniaŭ, u jakoj była Šacikava, advieźli ŭ dvor śpiecpryjomnika na Akreścina i trymali tam u aŭtazaku. Aktyvistka adčuła siabie drenna i paprasiła pomačy ŭ daktaroŭ. «Doktar na Akreścina abśledavaŭ mianie, spałochaŭsia i nakiravaŭ u balnicu», — skazała Chryścina. U špital jaje supravadžaŭ milicyjant. Jon ža prysutničaŭ padčas abśledavańniaŭ. «Jaho nie puścili tolki tudy, dzie było kresła», — udakładniła Šacikava.
Chryścina Šacikava znachodzicca ŭ 1-m hiniekałahičnym adździaleńni Haradskoj hiniekałahičnaj balnicy, što na vulicy Sieńnickaj. Pavodle słovaŭ zahadčycy adździaleńnia Śviatłany Kandrašovaj, daktary mieli padozrańnie na apapleksiju jaječnikaŭ i ŭnutrany kryvaciok u brušnuju połaść. Adnak ad apieracyjnaha ŭmiašalnictva vyrašyli admovicca. Doktar kaža, što da kanca tydnia Šacikava moža być vypisanaja.
* * *
«Naša Niva» budzie infarmavać pra dalejšaje raźvićcio padziej. Prosim paviedamlać pra ŭsie važnyja zdareńni i fakty praz nn@nn.by; telefony: +375