Bresckija aktyvisty damahlisia paŭtornaj pravierki ahitataraŭ za Łukašenku
Aktyvisty Ruchu «Za svabodu» Dzianis Turčaniak i Siarhiej Vakulenka praciahvajuć damahacca pryciahnieńnia da administracyjnaj adkaznaści kiroŭcy aŭtamabila, jaki ahitavaŭ u Breście padčas prezidenckaj kampanii za kandydata Łukašenku i ŭčyniŭ adrazu niekalki administracyjnych pravaparušeńniaŭ.
11 śniežnia 2010 aŭtamabil «Falksvahien», na jaki byli naniesienyja zakliki hałasavać za Łukašenku, byŭ pryparkavany na płoščy Lenina na chodniku, dzie, u adpaviednaści z artykułam 143 Praviłaŭ darožnaha ruchu, prypynak i stajanka transpartnych srodkaŭ zabaronienyja.
Artykuł 84 PDR zabaraniaje ruch transpartnych srodkaŭ pa chodnikach, adpaviedna, apynucca ŭ hetym miescy aŭtamabil moh, tolki papiarednie parušyŭšy patrabavańni dadzienaha artykuła.
Akramia inšaha, aŭtamabil jeździŭ pa horadzie sa schavanymi numarnymi znakami, što taksama zabaroniena praviłami darožnaha ruchu.
Situacyja paŭtaryłasia 18 śniežnia — za dzień da asnoŭnaha dnia hałasavańnia. Śviedki hetych parušeńniaŭ, naziralniki na vybarach Dzianis Turčaniak i Kaciaryna Šelest vyklikali inśpiektara DAI.
Prybyły supracoŭnik Dziaržaŭtainśpiekcyi, pahutaryŭšy z kiroŭcam «Falksvahiena», zajaviŭ, što ŭ dačynieńni kiroŭcy składzieny pratakoł ab administracyjnym pravaparušeńni za ŭtojvańnie numarnych znakaŭ, paśla čaho pajšoŭ. Cikava, što pasažyram mikraaŭtobusa była zahadčyca ideałahičnaha adździeła harvykankama Ała Starykievič.
Paśla sychodu supracoŭnika DAI ahitacyjny aŭtamabil praciahnuŭ ruch sa schavanymi numarami pa vulicach horada.
Jak naziralnik na vybarach Dzianis Turčaniak u toj ža dzień napisaŭ skarhu prakuroru Maskoŭskaha rajona Bresta z prośbaj pravieści pravierku pa nazvanych im faktach.
Pravierku pravodziła ŭpraŭleńnie DAI UUS Bresckaha abłvykankama. Adnak jaje vyniki nie zadavolili aktyvistaŭ Ruchu «Za svabodu» i śviedkaŭ incydentu.
Tak, Siarhieju Vakulenku i Dzianis Turčaniaku paviedamili, što faktu ŭtojvańnia numarnych znakaŭ na aŭtamabili «Falksvahien Karaveła»
4 studzienia Dzianis Turčaniak i Siarhiej Vakulenka pajšli na pryjom da namieśnika načalnika UUS Bresckaha abłvykankama Uładzimira Charyka, jaki padpisaŭ pastanovu ab spynieńni spravy ab administracyjnym pravaparušeńni.
Pad ciskam fota- i videadokazaŭ pradstaŭnik ułady pahadziŭsia admianić svaju pastanovu i zajaviŭ, što na padstavie skarhaŭ aktyvistaŭ budzie praviedzienaja paŭtornaja pravierka, a vinavatyja buduć pryciahnutyja da administracyjnaj adkaznaści.