KDB zabaraniŭ baćkam Iryny Chalip davać intervju
Uładzimiru i Lucynie Chalip zabaranili davać intervju žurnalistam. Heta «moža naškodzić dačce», skazali kadebisty.
Dniom 31 studzienia Uładzimir jašče biez prablemaŭ adkazvaŭ na pytańni žurnalista «NN». Adnak, kali praz paru hadzinaŭ, karespandenty pieratelefanavali jašče raz, kab damovicca na videaintervju, spadar Uładzimir vymušany byŭ admovicca.
Supracoŭniki KDB stroha papiaredzili: intervju žurnalistam mohuć naškodzić Irynie Chalip. Raniej Lucyna i Uładzimir Chalipy kantaktavali z presaj i sami nie raz padkreślivali važnaść padtrymki ŚMI. Hetym razam spadar Uładzimir vybačyŭsia, ale nie navažyŭsia, jak jon skazaŭ, ryzykavać mieraj strymańnia dački. Znachodžańnie Iryny doma siońnia vielmi važna dla ich usich i ŭ pieršuju čarhu dla Danika, adznačyŭ Uładzimir Chalip.