U śpisie nieŭjaznych — Jakubovič, jahonyja namieśniki, u tym liku i Šadryna
Razam ź Zimoŭskim u śpis trapili jahonyja kalehi pa błakitnym ekranie Kazijatka, Michalčanka i Prakopaŭ.
Na aficyjnym sajcie ES źjaviŭsia śpis 158 łukašenkaŭcaŭ, jakim zabaronieny ŭjezd u Jeŭrasajuz. Siarod ich jość i žurnalisty.U pryvatnaści, trapiŭ pad zabaronu były kiraŭnik BT Alaksandr Zimoŭski — tvorca kancepcyi pramyŭki mazhoŭ z dapamohaj nieabjektyŭnych telenavinaŭ. Zimoŭskamu nie pryvykać — jon prysutničaŭ na hanarovym miescy i ŭ papiarednim zabaronnym śpisie.
Razam sa svaim kaleham pa błakitnym ekranie ŭ śpis trapili viadučyja prapahandysty Kazijatka, Michalčanka i Prakopaŭ, a taksama źmienščyk i suaŭtar «Płoščy. Žalezam pa škle» Hienadź Davydźka.
U novy śpis uvajšli taksama redaktary šerahu dziaržaŭnych haziet, jakija asabliva vyłučylisia ŭ publikacyi paklopnickich materyjałaŭ pra apazicyju i pieratvaryli svaje, farmalna dziaržaŭnyja, heta značyć, jakija pavinny adlustroŭvać dumki ŭsiaho hramadstva, vydańni ŭ rupary adnaho palityka.
U śpisie znajšoŭsia pałymiany publicyst Vadzim Hihin. Hałoŭny redaktar orhana ideałahičnaj viertykali «Biełaruskaja dumka», jon zachoplena ŭchvalaŭ raspravy z palityčnymi praciŭnikami.
Što datyčyć «Sovietskoj Biełoruśsii», «hałoŭnaj haziety krainy», to ŭ śpis uvajšli nie tolki jaje hałoŭny redaktar Pavieł Jakubovič, ale i jahonyja namieśniki Taranda, Hardzijenka, Tarapieckaja i Šadryna.Cikava, što Hanna Šadryna paśla vybaraŭ syšła z haziety, što vyklikała čutki pra palityčnuju matyvacyju takoha kroku. Adnak sama Šadryna paśpiašałasia ich abvierhnuć, maŭlaŭ, vorahi prydumlajuć. I voś jana taksama trapiła ŭ śpis — jak kiraŭnica vydańnia, jakoje ŭ časie vybarčaj kampanii i paśla jaje parušała pryncypy abjektyŭnaści.
Pikantna toje, što Šadryna doŭhi čas była źviazana ź Jeŭrapiejskim humanitarnym univiersitetam. I voś ciapier jon zastajecca za miažoj.
Zrešty, usio heta lohkija maralnyja pakuty ŭ paraŭnańni z tym, što pieražyli aryštavanyja žurnalisty.
Byłaja namieśnica hałoŭnaha redaktara «Sovietskoj Biełorusii» Anna Šadryna prakamientavała dla «Našaj Nivy» rašeńnie Jeŭrasajuzu ab vizavych sankcyjach. Šadryna adna ź dziesiaci pradstaŭnikoŭ ŚMI, što trapili ŭ hety śpis.
«Mnie niepryjemna bačyć tam svajo proźvišča. Kaniečnie, ja razumieju, adkul hetaje rašeńnie. Ja 13 hadoŭ adpracavała ŭ haziecie «Sovietskaja Biełoruśsija». Kali heta pavodle pryncypu prynaležnaści da dziaržaŭnha vydańnia, to ja hatova nieści adkaznaść. Kaniečnie, pa mnie ŭdaryć, kali ja nie zmahu naviedvać zamiežža».