Siamaška: Biełaruś dasiahnuła absalutnaha kampramisu z «Hazpramam» u pierahavorach pa pastaŭkach hazu

Biełaruś dasiahnuła absalutnaha kampramisu z «Hazpramam» u pierahavorach pa pastaŭkach hazu. Ab hetym paviedamiŭ siońnia žurnalistam pieršy namieśnik prem'jer-ministra Biełarusi Uładzimir Siamaška.

Uładzimir Siamaška nahadaŭ ab niadaŭniaj sustrečy sa staršynioj «Hazprama» Alaksiejem Mileram. «Mnie zdałosia, što my znajšli absalutny kampramis i pryjšli da ŭzajemavyhadnych damoŭlenaściej», — padkreśliŭ jon.

Pieršy vice-premjer, u pryvatnaści, adznačyŭ, što na pierahavorach abmiarkoŭvaŭsia kantrakt na 2012–2014 hady. U suviazi z hetym jon nahadaŭ, što ŭ studzieni 2015 hoda ŭ ramkach Mytnaha sajuza baki pavinny vyjści na roŭnadachodnyja ceny na haz. Asnoŭnyja padychody pa hetym pytańni i byli ahavorany. «Asnoŭnyja momanty ahavorany, u tym liku što takoje roŭnadachodnaść — jana vyznačajecca pa toj formule, jakaja ŭ 2007 hodzie pryniata ŭ Rasii ŭ FST, — udakładniŭ jon. — Dla nas heta formuła vyhadnaja, jana daje mahčymaść źnizić ceny na haz».

Uładzimir Siamaška taksama adznačyŭ, što z ulikam abmierkavanych bazavych pryncypaŭ budzie składacca kantrakt na pastaŭku hazu ŭ Biełaruś i tranzit praź jaje terytoryju na 2012–2014 hady. «Dziejučy kantrakt zakančvajecca 31 śniežnia 2011 hoda, tamu, kab nie stvarać niejkich niehatyŭnych precedentaŭ, ažyjatažu ŭ kancy hoda, my vyrašyli abmierkavać hetu temu», — rastłumačyŭ pieršy vice-premjer.

Jon adznačyŭ, što «Hazpram» nie zaŭsiody moža prymać rašeńnie. Kali razmova idzie ab hłabalnych i surjoznych pytańniach, nieabchodny kansultacyi na ŭzroŭni ŭrada.

Adkazvajučy na pytańni žurnalistaŭ ab pierśpiektyvach partniorstva Biełarusi z kampanijami «Itera» i «Novatek», Uładzimir Siamaška źviarnuŭ uvahu, što ŭ Rasii sapraŭdy «ŭźnimajucca kampanii, tak zvanyja niezaležnyja zdabytčyki pryrodnaha hazu». Naprykład, «Novatek» — heta surjozny ihrok na rynku. Adzinaja ekanamičnaja prastora praduhledžvaje normu pa svabodnamu dostupu da hazatranspartnych mahutnaściej, razburajučy pry hetym manapoliju «Hazprama». «Kali „Novatek“ mnie daść na n dziasiatkaŭ dołaraŭ tańniej haz, to ja budu ŭ jaho kuplać, a nie ŭ „Hazprama“, — rastłumačyŭ Uładzimir Siamaška, — a „Hazpram“ pry najaŭnaści transpartnaj mahčymaści, svabodnaj truby abaviazany puścić nas z „Novatekam“ abo „Iteraj“ u hetu trubu».

U toj ža čas, na dumku pieršaha vice-premjera, heta tema ciapier nie aktualnaja. Jana naśpieje ŭ trecim-čaćviortym kvartale hetaha hoda.

Kamientary da artykuła