«Paravoz — pad adkos!»

Na «Minsk-Arenie» znoŭ pastaŭleny rekord naviedvańniaŭ. «Dynama» paviało ŭ sieryi z «Łakamatyvam» — 2:1.

Minskaje «Dynama» vyjhrała ŭ subotu ŭ jarasłaŭskaha «Łakamatyva» 4:1 i paviało ŭ sieryi plej-of ¼ Zachodniaj kanfierencyi ź likam 2:1.

Płat (źleva) zakinuŭ čarhovuju pieramožnuju šajbu, goals.by

«Parovoz — pod otkos!» — skandavali ŭvieś matč zaŭziatary na «Minsk-Arenie». Hulnia sabrała anšłah dy pabiła čarhovy rekord naviedvalnaści matčaŭ Kantynientalnaj chakiejnaj lihi.

Siońnia hulniu naviedali 15 982 zaŭziatary.

Dva papiarednija rekordy (21 vieraśnia z «Ak Barsam» i 30 studzienia z CSKA) taksama byli ŭstalavanyja ŭ Minsku.

Pačatak hulni byŭ abstalavany jak maje być. Pahasła śviatło i zaŭziatary zapalili ekrany svaich mabilnikaŭ. Tak było i na matčy z CSKA — darečy, akcyja padhledžana ŭ Ryzie. Potym było sumiesnaje vykanańnie dziaržaŭnaha himna: dziakujučy citram na ekranach himn śpiavała ŭsia «Minsk-Arena», jakaja afarbavałasia ŭ bieła-sinija kolery.

Užo ź pieršych imhnieńniaŭ arena pahnała svaich lubimcaŭ napierad. I na 48-j siekundzie Devid Piatrašak ź pieradačy Piatra Sikory adkryŭ lik u matčy. Praź dźvie z pałovaj chviliny «Łakamatyŭ» lik zraŭniaŭ, ale na 10-j chvilinie Džef Płat vyvieŭ «Dynama» napierad.

Paśla taho jak ŭ siaredzinie druhoha pieryjada Alaksandr Kułakoŭ realizavaŭ bulit, pryznačany za hrubuju hulniu, stała jasnym, što «Dynama» pieramohi siońnia nie ŭpuścić. Tym bolš, kab dać astyć straściam Marek Sikora apieratyŭna ŭziaŭ 30-siekundnytajm-aŭt.

«Dynama» vyjhrała ź likam 4:1.

Admietna, što ŭ trecim zapar matčy «Dynama» zakidvaje čatyry šajby. Nahadajem, što ŭ pieršym, 23 lutaha, «Dynama» prajhrała «Łakamatyvu» 4:7, na nastupny dzień vyjhrała ź likam 4:1. Paśla siońniašniaj pieramohi «Dynama» paviało ŭ sieryi 2:1, jakaja, darečy, doŭžycca da čatyroch pieramohaŭ adnoj z kamandaŭ.

Čaćviertaja hulnia projdzie ŭ niadzielu, 27 lutaha, na «Minsk-Arenie», piataja — u aŭtorak u Jarasłaŭli.

Pa trybunach pajšli čutki, što niadzielny matč naviedaje Sam. I zaŭziatary, i žurnalisty ŭžo skryhočuć zubami.

Nadhlad na "Minsk-Arenie" budzie niasłaby. Siońnia, darečy, taksama siarod tych, chto kiravaŭ siekjuryci, byŭ Alaksandr Łukomski -- kamandzir pałka milicyi śpiecyjalnaha pryznačeńnia (PMSN) HUUS Harvykankama.

Paśla taho, jak skončyłasia hulnia (zaŭziatary tradycyjna zładzili avacyju i doŭha skandavali proźvišča hieroja hulni — biełaruska-amierykanskaha hałkipiera Robierta Eša, jaki adbiŭ 35 kidkoŭ),

arhanizatary pastavili pieśniu z «Apieracyi «Y» — «Postoj, parovoz, nie stučitie kolesa».

Praŭda, prahučaŭ tolki adzin kuplet, i pieśnia spyniłasia. Napeŭna, padumali, što heta nie karektna ŭ dačynieńni da haściej.

Na paślamatčavaj pres-kanfierencyi trenier Jarasłaŭla Uładzimir Vujtek zajaviŭ, što jamu pryjemna było hulać pry takim anšłahu. «Takoje ŭ maim žyćci było tolki adnojčy (16 tys. hledačoŭ)», — skazaŭ koŭč, u finale maładziožnaha čempijanatu pa chakiei ŭ Kałhary.

** *

U niadzielu minski zaŭziatar budzie mieć niaprosty vybar.

A 17-j na «Minsk-Arenie» — chakiej, a 15-j u Pałacy sportu — matč handbolnaj Lihi čempijonaŭ pamiž minskim «Dynama» z dackim «Olbarham». Biełaruski kłub maje realny šaniec trapić u plej-of i pryvieźci ŭ Minsk hranda jeŭrapiejskaha handboła.

A 17-j, paralelna z chakiejem, pačniecca matč za futbolny Supierkubak pamiž barysaŭskim BATE, jaki z vysoka ŭźniataj hałavoj viartajecca z Paryža, i žodzinskim «Tarpieda-BiełAZam» ci nie adzinym biełaruskamoŭnym kłubam u vyšejšaj biełaruskaj lizie.

***

«Dynama-Minsk» — «Łakamatyŭ» Jarasłaŭl — 4:1 (2:1, 1:0, 1:0). Minsk, 26 lutaha. 15 982 hledačy.

Šajby: 1:0. 0:47 — Pietrašak, (Hłazačaŭ, Sikora),
1:1. 3:24 — Vašyčak
2:1. 9:43 — Płat (Padhradski, u bolšaści)
3:1. 29:25. Kułakoŭ (bulit)
4:1. 49:08 — Drozd (Stefanovič).

Štraf: 12–12

Kamientary da artykuła