Rejtynh Hrecyi paniziŭsia da rejtynhu Biełarusi

Mižnarodnaje rejtynhavaje ahienctva Moody's paniziła kredytny rejtynh Hrecyi na try punkty — z Ba1 da B1.

Prahnoz pa rejtynhu — «niehatyŭny». U svaju čarhu, Minfin Hrecyi nazvaŭ rašeńnie Moody's «absalutna nieabhruntavanym».

U mai 2010 hoda Hrecyja paźbiehła defołtu, pahadziŭšysia atrymać 110-miljardnuju kredytnuju padtrymku ES i MVF u abmien na žorstkija reformy, nakiravanyja na skaračeńnie deficytu biudžetu krainy. Źnižeńnie rejtynhu Moody's adlustroŭvaje zaniepakojenaść ahienctva tym, nakolki ŭrad Hrecyi zdolny ŭ takich umovach pravieści nieabchodnyja reformy.

Moody's ŭličyła pry pryniaćci svajho rašeńnia ciažkaści, ź jakimi ŭrad Hrecyi moža sutyknucca pry zbory padatkaŭ. Narešcie, Moody's bačyć istotnuju ryzyku restrukturyzacyi doŭhu da abo paśla 2013 hoda, kali zakančvajecca kredytnaja padtrymka ES i MVF, paviedamlaje Lenta.ru.

Ciapier rejtynh B1, pa viersii Moody, taksama majuć Biełaruś i Balivija. Pa škale Moody hetamu rejtynhu adpaviadajuć krainy, inviestycyi ŭ jakija analityki kampanii ličać niepažadanymi. Pa statystycy, 20 adsotkaŭ pazyčalnikaŭ z takim rejtynham na praciahu piaci hadoŭ sutykajucca z defołtam. Apošni inviestycyjny rejtynh Hrecyja straciła ŭ studzieni 2011 hoda, kali rejtynhavaje ahienctva Fitch paniziła jaho z BBB- da BB +.

Kamientary da artykuła