Akcyja «Stop, bienzin» prajšła ŭ Breście

Pryblizna 100 čałaviek uziali ŭdzieł u akcyi suprać pavyšeńnia cen na paliva viečaram 24 maja ŭ Breście.

U ich liku byli miascovyja pradstaŭniki arhkamiteta pa stvareńni partyi «Biełaruskaja chryścijanskaja demakratyja», aktyvisty rehijanalnych struktur Biełaruskaj sacyjał-demakratyčnaj partyi (Hramada), Abjadnanaj hramadzianskaj partyi, Biełaruskaj partyi levych «Spraviadlivy śviet», paviedamiŭ BiełaPAN adzin z kaardynataraŭ akcyi ŭ Breście, člen arhkamiteta pa stvareńni BCHD Dźmitryj Šurchaj, davieranaja asoba Vitala Rymašeŭskaha na prezidenckich vybarach.

Pavodle słoŭ Šurchaja, aŭtamabilisty sabralisia na stajancy kala ŭvachodu ŭ miemaryjalny kompleks «Bresckaja krepaść-hieroj» i kałonaj prajechali pa centralnych vulicach horada da spartyŭnaha kompleksu «Viktoryja».

«Pa chodzie ruchu da nas dałučalisia novyja aŭtamabilisty. U vyniku ŭ akcyi ŭziali ŭdzieł bolš jak 40 aŭtamabilaŭ, — zaznačyŭ Šurchaj. — Praktyčna na ŭsich mašynach byli łahatypy akcyi, tamu inšyja vadzicieli, jakija jechali pa hetych vulicach, sihnalili nam, vykazvajučy svaju salidarnaść».

Jak i padčas papiaredniaj akcyi, ludźmi ŭ cyvilnym viałosia videazdymańnie ź lehkavoha aŭtamabila.

«Ja miarkuju, nam udałosia dasiahnuć adnoj z hałoŭnych metaŭ akcyi: pakazać, što jość brestaŭčanie, jakija nie bajacca publična vystupać suprać čarhovaha padaražańnia aŭtamabilnaha paliva», — zajaviŭ Šurchaj.

Nichto z udzielnikaŭ akcyi zatrymany nie byŭ.

U akcyi «Stop-bienzin», jakaja adbyłasia ŭ Breście ŭ červieni 2010 hoda, uziali ŭdzieł 10 aŭtamabilistaŭ, u anałahičnaj 28 krasavika hetaha hoda — prykładna 40.

Kamientary da artykuła