Hulnia ŭ vajnušku: sioleta parad na 3 lipienia projdzie ŭ poŭnym abjomie

Niahledziačy na niejubilejnuju datu, vajenny parad u Minsku 3 lipienia, u Dzień Niezaležnaści, adbudziecca ŭ poŭnym abjomie.

Jak paviedamiła pres-słužba Ministerstva abarony, płanujecca, što ŭ paradzie voźmuć udzieł vychavancy Minskaha suvoraŭskaha vajennaha vučylišča, kursanty Vajennaj akademii, vajenna-techničnaha fakulteta BNTU, vajennasłužačyja 120-j hvardziejskaj asobnaj miechanizavanaj bryhady, 85-j i 86-j bryhad suviazi, 38-j i 103-j asobnych mabilnych bryhad, transpartnych vojskaŭ, zbornaj roty hanarovaj varty, a taksama zborny arkiestr Uzbrojenych sił.

Pierad trybunami hledačoŭ projdzie technika časoŭ Vialikaj Ajčynnaj vajny, asnoŭnyja ŭzory ŭzbrajeńnia i vajennaj techniki Uzbrojenych sił Biełarusi. U niebie nad Minskam žychary i hości stalicy zmohuć ubačyć avijacyjnuju techniku Vajenna-pavietranych sił i vojskaŭ supraćpavietranaj abarony.

Varta adznačyć, što raniej u takim składzie vajenny parad pravodziŭsia tolki pa jubilejnych datach: u 2009 hodzie ŭ aznamienavańnie 65-hodździa vyzvaleńnia Biełarusi ad niamiecka-fašysckich zachopnikaŭ, u 2010-m — 65-hodździa Pieramohi ŭ Vialikaj Ajčynnaj vajnie. Pierad hetym arhanizatary dziejstva abmiažoŭvalisia ŭdziełam u paradzie piešych kałon.

Pavodle infarmacyi pres-słužby Minabarony, z 17 maja ŭ miežach druhoha etapu padrychtoŭki ŭ Minskam harnizonie prachodziać treniroŭki piešych paradnych raźlikaŭ.

Hienieralnyja treniroŭki parada płanujecca pravieści 28 i 30 červienia.

Kamientary da artykuła