FK «Dynama» (Minsk) ličyć «absalutna nieapraŭdanymi» dziejańni AMAPa na matčy ŭ Babrujsku

Futbolny kłub «Dynama» (Minsk) 31 maja vystupiŭ z zajavaj adnosna incydentu 27 maja padčas matču čempijanatu Biełarusi z babrujskaj «Biełšynaj».

«Na 68-j chvilinie sustrečy paśla hoła Rafaeła Ledesmy futbalisty minskaha „Dynama“ padbiehli da fan-siektara, kab raździalić radaść ad hetaha pośpiechu sa svaimi balelščykami. Adzin z supracoŭnikaŭ pravaachoŭnych orhanaŭ, jakija zabiaśpiečvali biaśpieku matču, čamuści ŭspryniaŭ burnaje prajaŭleńnie emocyj na dynamaŭskaj trybunie jak pahrozu ŭźniknieńniu biesparadkaŭ i prymianiŭ śpiecsrodak. Ad raspylenaha hazu paciarpieli niekalki čałaviek z fanataŭ, u tym liku piacihadovaje dzicia, jakoje pryjechała z baćkam na futboł», — zaznačajecca ŭ zajavie.

«Vyvučeńnie videazapisu hetaha epizodu i pakazańni vidavočcaŭ dajuć padstavu śćviardžać,

što balelščyki nie vyskokvali na pole i nie davali supracoŭnikam AMAPa padstavu dla takich dziejańniaŭ, jakija, na naš pohlad, byli absalutna nieapraŭdanymi», — miarkujuć u kłubie.

Razam z tym kłub «aburany sprobami šerahu srodkaŭ masavaj infarmacyi nadać incydentu palityčnuju afarboŭku». «Jak rastłumačyli ŭ hutarcy z kiraŭnictvam kłuba pradstaŭniki fanackaha ruchu, jakija prysutničali na matčy, vykryki „Nienavidzim režym!“ byli spravakavanyja nieadekvatnymi dziejańniami supracoŭnikaŭ mahiloŭskaha AMAPa i vykazvali vyklučna pratest suprać praduziataha staŭleńnia pravaachoŭnych orhanaŭ da balelščykaŭ, imknieńnia zahnać ich u stroha akreślenyja ramki i pazbavić mahčymaści svabodna vykazvać emocyi. A ŭsim, chto choča ŭkłaści ŭ skandavańnie fanataŭ niejki inšy sens, chočacca nahadać: futboł pa-za palitykaj», — havorycca ŭ zajavie.

U «Dynama» zaznačajuć, što prablema ŭzajemaadnosin fanataŭ i milicyi isnuje nie pieršy dzień. «Nieadnarazova pravodzilisia sustrečy fanataŭ z pradstaŭnikami pravaachoŭnych orhanaŭ, ABFF i kłuba, padčas jakich udałosia dasiahnuć razumieńnia pa niekatorych pytańniach. Na žal, časam jašče zdarajucca incydenty nakštałt taho, što adbyŭsia ŭ Babrujsku», — padkreślivajuć u kłubie.

«Dynama» zaklikaje kiraŭnictva orhanaŭ pravaparadku i fiederacyju

«źviarnuć uvahu na toje, što zdaryłasia, i pryniać adpaviednyja zachady, kab vyklučyć u budučym takija źjavy, jakija niehatyŭna adbivajucca na imidžu biełaruskaha futboła».

Kamientary da artykuła