Atrymana paśviedčańnie ab śmierci Antona Łuckieviča
Hetymi dniami Marharyta Piarova, unučataja plamieńnica Staršyni Rady Ministraŭ i ministra zamiežnych spravaŭ Biełaruskaj Narodnaj Respubliki Antona Łuckieviča, atrymała z adździeła zapisu aktaŭ hramadzianskaha stanu pa h. Atkarsku i Atkarskim rajonie Sarataŭskaj vobłaści paśviedčańnie ab śmierci svajho znakamitaha rodziča.
U svoj čas u časopisie ARCHE byli nadrukavanyja dakumienty ab śmierci Antona Łuckieviča na pierasylnym punkcie ŭ h. Atkarsk, a ŭ knizie jaho tvoraŭ «Baraćba za vyzvaleńnie» (2009) — fotakopii rapartu načalnika sanitarnaj častki načalniku Atkarskaha pierasylnaha punkta ab śmierci A. Łuckieviča i aktu ab jaho pachavańni. Adnak u niekatorych daviednikach da hetaha času pišuć, što A. Łuckievič pamior «kala 1946 h.».
Z dakumienta, atrymanaha Marharytaj Piarovaj, vynikaje, što zapis aktu ab śmierci Antona Łuckieviča za numaram 390 zrobleny jašče 30 listapada 1943 hoda. Hety dakumient jašče raz śviedčyć, što synam Antona Łuckieviča (abodva ŭžo nie žyvuć) u adpaviednaści z tahačasnymi instrukcyjami było vydadzienaje falšyvaje paśviedčańnie ab śmierci ich baćki.
Treba spadziavacca, što ciapier u daviedačnaj litaratury i ŭ elektronnym katałohu Nacyjanalnaj biblijateki Biełarusi ŭ pryvatnaści buduć paviedamlać praŭdzivuju datu śmierci aŭtara aktu 25 Sakavika.