Banki spyniajuć brać rubli ŭ pahašeńnie valutnych kredytaŭ

Valutnyja kredyty pierastali vydavać nasielnictvu amal dva hady, ale prablemy z vypłatami abvastrylisia z novaj siłaj. Z 27 maja dva banki — MTBank i Biełrosbank — spynili pryjom płaciažoŭ pa valutnych kredytach u biełaruskich rublach, patrabujučy vykanańnia abaviazacielstvaŭ u valucie kredytu.

Praŭda, u Biełrasbanku abnadzieili, što takaja praktyka ŭviedziena časova i na nastupnym tydni, mahčyma, znoŭ źjavicca mahčymaść apłačvać kredyt rublami.

Pres-sakratar — načalnik upraŭleńnia infarmacyi Nacyjanalnaha banka Anatol Drazdoŭ patłumačyŭ, što ŭsie rekamiendacyi z hetaj nahody Nacyjanalny bank užo daŭ. «Usio zaležyć ad taho, jak prapisany kredytny dahavor. Kali prapisana, što zvarot kredytu mahčymy tolki ŭ valucie kredytu, to Nacbank na heta paŭpłyvać nie moža. Kali kredytaatrymalnik choča viartać kredyt rublami i bank nie suprać, to padpisvajecca dadatkovaje pahadnieńnie, pakolki havorka idzie ab istotnaj źmienie damovy. Pry hetym bank maje prava prymianiać dahavornaj kurs. Ale kali dahavoram heta nie praduhledžana, to bank maje poŭnaje prava patrabavać apłaty ŭ valucie kredytu. Jakija tut mohuć być rekamiendacyi z boku Nacbanka, i navošta my budziem ŭmiešvacca ŭ pracu bankaŭ? « — rastłumačyŭ jon pazicyju Nacbanka.

Drazdoŭ dadaŭ, što i siońnia bolšaść bankaŭ zhadžajucca prymać apłatu rublami, pryčym mnohija — pa aficyjnym kursie. «Na toje, što niekatoryja banki ŭžyvajuć bolš vysoki kurs, uvahu źviartajuć, a Biełarusbank, Biełahraprambank ź vialikaj kolkaściu kredytaatrymalnikaŭ, niekatoryja inšyja banki ŭvieś hety čas prymali płaciažy pa aficyjnym kursie. Treba ŭmieć vybirać bank i nie padpisvać damovy, nie čytajučy», — prakamientavaŭ pres-sakratar Nacbanka.

Kamientary da artykuła