Zrabi padarunak dla Mahilova — vykupi knihu ChVIII stahodździa!
Cana vydańnia — $500.
Andrej Radkoŭ, dziakujučy jakomu letaś ź Biełarusi nie vyvieźli Mietryčnuju knihu Iškaldskaha kaścioła, zaklikaje vyratavać jašče adno kaštoŭnaje vydańnie. Z dapamohaj zahadčyka adździeła redkaj knihi Nacyjanalnaha histaryčnaha archiva Źmitra Jackieviča jon sprabuje vykupić «Časoŭnik».
Heta vydańnie ChVIII stahodździa, jakoje vyjšła ŭ Mahilovie ŭ drukarni Bohajaŭlenskaha pravasłaŭnaha bractva pa zamovie staravieraŭ. Pa papiaredniaj ekśpiertyzie, jakuju pravodzili śpiecyjalisty, kniha pabačyła śviet prykładna ŭ 1773 hodzie ŭ drukarni, zasnavanaj jašče Śpirydonam Sobalem.
Andrej źviartaje ŭvahu, što asobnikaŭ takoj knihi nie tak i šmat zachavałasia. A vydańnie, jakoje jon adšukaŭ u adnaho z kalekcyjanieraŭ, ciapier vystaŭlena na aŭkcyjon. Małady čałaviek damoviŭsia z kalekcyjanieram, što pasprabuje vykupić «Časoŭnik». Cana — $500. Ale takich hrošaj jon pakul nie maje. I źviartajecca da hramadskaści z prośbaj dapamahčy. Pieraličyć hrošy možna na rachunak:
ASB Biełarusbank 514/300 01146417 na imia Radkova Andreja Uładzimiraviča. Kantaktny numar: +375-25-7457467.
Da Andreja ŭžo źviarnulisia pieršyja ludzi z prapanovaj dapamahčy. Siarod ich biełarusy i žychar Hiermanii. A dyrektar Muzieja historyi Mahilova prapanavaŭ vykupić knihu dla jaho muzieja. I hatovy znajści častku hrošaj — 1600000 rubloŭ.
U minułym hodzie student BDU Andrej Radkoŭ arhanizavaŭ zbor srodkaŭ, kab na internet-aŭkcyjonie vykupić Mietryčnuju knihu (1759-1807) Iškaldskaha kaścioła. Mierkavałasia, što ŭ hetym vydańni moža być zapis ab chroście našaha słavutaha ziemlaka Ihnata Damiejki. Bo naradziŭsia jon niedaloka ad Iškaldzi u v. Miadźviedka, ale miesca jaho chryščeńnia nieviadomaje. Andrej paviedamiŭ, što jon taki zapis nie vyjaviŭ. Ale
na staronkach knihi sustreŭ zhadku, jakaja tyčycca baćki nacyjanalnaha hieroja Čyli Ipalita Damiejki: jon byŭ śviedkam chrostu niemaŭlataŭ ź siamji Vieraščakaŭ.
Paśla hetaj znachodki krajaznaŭca ź vioski Ciešaŭli Baranavickaha rajona Vasil Dubiejka pieradaŭ Andreju Radkovu i staršyni Tavarystva achovy pomnikaŭ Antonu Astapoviču jašče dźvie Mietryčnyja knihi Iškaldskaha kaścioła (u adnoj paznačany tolki chrosty z 1807 hoda, u druhoj — śmierci ad 1835 hoda). A taksama asobnyja dakumienty: listavańnie minskaha jepiskapa sa śviatarom ź Iškaldzi (1919 hod); arkuš sa śpisu prychadžan kaścioła siaredziny XIX stahodździa; dyjaryuš žychara Iškaldzi, datavany 1931 hodam.
Ciapier viadiecca praca pa adličbavańni ŭsich dakumientaŭ.
Praces idzie marudna, bo Andrej usio apracoŭvaje za ŭłasnyja srodki. I na siońnia tolki pieršuju Mietryčnuju knihu ŭdałosia całkam adskanavać. Miarkujecca, što ŭsie elektronnyja kopii buduć pieradadzieny ŭ biełaruskija muziei i biblijateki.
Što ž budzie z aryhinałami? Pieršuju znachodku chacieli viarnuć u Iškaldski kaścioł. Ale, pa słovach Andreja, tam niama naležnych umovaŭ dla jaje zachavańnia. Tamu Tavarystva achovy pomnikaŭ vykazałasia pra stvareńnie Archiŭna-muziejnaha centra na bazie katalickaha kaścioła (padobnaja ŭstanova ŭžo isnuje ŭ pravasłaŭnych). Adpaviednyja pieramovy pravodzilisia ź mitrapalitam Tadevušam Kandrusievičam. Małady čałaviek adznačaje, što heta sprava nie adnaho dnia. Tamu kančatkovaje rašeńnie jašče nie pryniataje.