Biełarusaŭ Maskvy zaklikajuć uskłaści kvietki ŭ hadavinu terakta
«Terakt nie pavinien raźjadnoŭvać biełarusaŭ», havorycca ŭ zajavie, raspaŭsiudžanaj hrupaj biełarusaŭ Maskvy
Z nahody ŭhodkaŭ terakta 11 krasavika 2011 h. pradstaŭniki biełaruskaj dyjaspary Maskvy zaklikajuć suajčyńnikaŭ uskłaści kvietki da ambasady Biełarusi.
«Roŭna hod tamu, 11 krasavika 2011 h., u samym sercy Biełarusi adbyŭsia žachlivy terakt, jaki zabraŭ žyćci piatnaccaci našych ziemlakoŭ, pakalečyŭ dziesiatki losaŭ i pakinuŭ ranu ŭ dušy kožnaha z nas.
Zdavałasia b, adkazam na hety kryvavy terakt, jaki hramychnuŭ na piku i biez taho skrajnie napružanaj ekanamičnaj i palityčnaj abstanoŭki ŭ krainie, pavinna była stać kansalidacyja ŭsiaho biełaruskaha hramadstva. Tak heta zaviedziena ŭ luboj zdarovaj družnaj siamji.
Na žal, hramadskaści byli padadzienyja inšyja sihnały, jakija nie spryjajuć jadnańniu naroda i adnaŭleńniu davieru. Nieprazrystaje rasśledavańnie i nastupnyja vyrazna nie rastłumačanyja sudovyja rašeńni vyklikali siarod biełarusaŭ škvał sumnievaŭ, asudžeńniaŭ i rospačy. Vynikam staŭ nie tolki čarhovy raskoł u biełaruskim hramadstvie, ale taksama i novyja supiarečnaści pamiž Respublikaj Biełaruś i jaje partniorami, pierš za ŭsio Rasijskaj Fiederacyjaj i Jeŭrapiejskim Sajuzam, jakija asudzili pakarańnie prysudžanych da rasstrełu ŭ Minsku.
11 krasavika 2012 h. z 19:00 biełarusy Maskvy vykažuć salidarnaść ź siemjami zahinułych i paciarpiełych padčas teraktu ŭ Minskaj padziemcy ŭ minułym hodzie. Upeŭnienyja, našy rasijskija siabry taksama nas u hetym padtrymajuć, jak heta było nie raz.
Heta nie mitynh, nie pikiet, ale asabistaje ŭskładańnie kvietak, zapalvańnie śviečak la budynka ambasady Respubliki Biełaruś u Rasijskaj Fiederacyi ŭ hadavinu trahičnaj dla ŭsich biełarusaŭ daty.
Razam biełarusy pieražyli šmat ciomnych dzion u svajoj historyi — prademanstrujem salidarnaść i ŭ hetym hory.
My adzin narod!»
Adras ambasady:
Marosiejka, 17/6, m. Kitaj-horod