Pamior Uładzimir Uchin — dziadźka Vałodzia z «Spokojnoj noči, małyši»

13.04.2012 / 13:49

Jon byŭ u pieradačy ad pieršaha vypusku.

12 krasavika na 82-m hodzie žyćcia pamior znakamity televiadoŭca, zasłužany dyktar Centralnaha telebačańnia i zasłužany artyst Rasii Uładzimir Uchin — dziadźka Vałodzia sa «Spokojnoj noči, małyši».

Uładzimir Uchin pryjšoŭ na TB u 1960 hodzie. Jamu spoŭniłasia 30 hadoŭ, jon paśpieŭ try hady pravučycca ŭ Sielhaśpinstytucie ŭ rodnym Omsku, skončyć estradnyja kursy pry maskoŭskim Teatry estrady i skončyć estradnaje ž adździaleńnie HITISa. Ale na telebačańni Uchin pačaŭ nie zusim pa śpiecyjalnaści — prostym dyktaram.

Šoumienam, kali kazać pa-sučasnamu, jon staŭ praz čatyry hady, kali ŭpieršyniu vyjšła ŭ efir pieradača «Spokojnoj noči, małyši», a Uchin zrabiŭsia jaje pieršym viadoŭcam.

Hetaja pieradača była ledź nie adzinaj dziciačaj na savieckim telebačańni ŭ toj čas. Jana źjaviłasia jak pierajmańnie hedeeraŭskaj i chitom stała daloka nie adrazu —

niekalki hadoŭ syšło na toje, kab namacać i zrabić dobra. Znajomy ŭsim vyhlad pieradača nabyła tolki praz hady dziakujučy cełaj kamandzie vydatnych ludziej. Nad joj pracavali Alaksandr Kurlandski, Eduard Uśpienski, režysiory, apieratary, scenarysty i multyplikatary — zastaŭka źjaviłasia adrazu animacyjnaja, kłasičnuju płastylinavuju rabiŭ Alaksandr Tatarski, a pieśniu «Śpiat ustałyje ihruški» praśpiavaŭ znakamity Aleh Anofryjeŭ.

Ale na vidu byŭ viadoŭca, jaki chutka staŭ dziadźkam Vałodziem, i cacki — Chruša, Ściapaška, Fila (za imi, viadoma, stajali aktory-lalečniki, ale chto ŭ tyja hady viedaŭ imiony Alaksandra Ačaracianskaha, Natalli Dziaržavinaj i Natalli Hałubiencavaj?).

Mienavita ich i bačyli, i lubili dzieci: jany razyhryvali scenki, abviaščali multfilm, a zatym raźvitvalisia, žadajučy dobraj nočy.

U 70-ja dziadźka Vałodzia ŭžo byŭ nie adzin: u roznyja hady pieradaču viali ciotka Vala (Valancina Lavonćjeva), ciotka Śvieta (Śviatłana Žylcova), ciotka Tania (Taćciana Viedzianiejeva), ciotka Lina (Anhielina Voŭk), dva dziadźki Jury (Juryj Hryhorjeŭ i Juryj Nikałajeŭ)…

Takaja raznastajnaść navat vyklikała jašče adnu intryhu dla junych hledačoŭ u dadatak da vyśviatleńnia naboru źviarkoŭ i jaki mulcik pakažuć: chto ž z darosłych pryjdzie ŭ dziciačy śviet siońnia?

U kožnaha viadoŭcy byŭ svoj vobraz, charaktar i svaja admietnaja jakaść, ale

dziadźku Vałodziu vyłučała ŭtulnaja, ź lohkim adcieńniem mientarstva łahodnaść.

U kožnaha ź viadoŭcaŭ byli i inšyja zaniatki: Śviatłana Žylcova viała moŭnyja pieradačy, Anhielina Voŭk — naviny, Juryj Nikałajeŭ — «Ranišniuju poštu», ale sa «Spokojnoj noči, małyši» pierš za ŭsio asacyjavaŭsia dziadźka Vałodzia. Mienavita tamu dla savieckaha dziciaci jon byŭ adnym z pastajannych piersanažaŭ jaho žyćcia, čymści nakštałt člena siamji — razam ź niańkami, vychavalnicami i nastaŭnicami pačatkovych kłasaŭ.

Uładzimir Uchin addaŭ pieradačy 31 hod, bolš, čym chto-niebudź inšy ź viadoŭcaŭ. Zrazumieła, za hety čas u jaho była i inšaja praca.

Jon vioŭ niekalki pieradač, zdymaŭsia ŭ kino — u «Vialikaj kaśmičnaj vandroŭcy» i «Pradčuvańni kachańnia», dzie faktyčna syhraŭ samoha siabie.

Syšoŭ jon u 1995-m, kali pieradača raźvitałasia z usimi «starymi» viadoŭcami, i ŭžo bieź jaho było zakryćcio (iznoŭ praz hrošy), «vysyłka» na kanał «Kultura», jaki tady viaščaŭ daloka nie ŭsiudy, i viartańnie na RTR.

Siońniašni farmat pieradačy Uchin tak i nie pryniaŭ. «Nu što jany mohuć raskazać dzieciam za piać chvilin? U nas u svoj čas było 15, a to i 20 chvilin na pieradaču. Nie tolki na multfilm chapała, jašče i žyćciu navučyć. A ciapier…» —

kazaŭ jon u intervju niekalki hadoŭ tamu.

Čytajcie taksama:

Kamientary da artykuła