Paschalnaje pasłańnie Usiaśvietnaha Patryjarcha Varfałamieja
VARFAŁAMIEJ
ŁASKAJ BOŽAJ
ARCHIJEPISKAP KANSTANCINOPALSKI - NOVAHA RYMU
I ŬSIAŚVIETNY PATRYJARCH
USIOJ SUPOLNAŚCI CARKVY
ŁASKA, MIR I MIŁAŚĆ CHRYSTA ZBAŬCY, UVASKRESŁAHA Ŭ SŁAVIE
Pieršyniec ź miortvych Jon
(Trapar Uvaskrasieńnia 3 tonu)
Lubyja dzieci ŭ Hospadzie,
Kali b Chrystova Uvaskrasieńnie datyčyła tolki Jaho Samoha, jaho važnaść dla nas była b minimalnaj. Ale Chrystos uvaskrasaje nie adzin. Suvaskrasajuć ź Im i ŭsie ludzi. Pra heta abviaščaje naš papiarednik, śviaty Jan Załatavusny: “Uvaskros Chrystos - i nikoha ź miortvych u mahile. Bo Chrystos, paŭstaŭšy ź miortvych, Pieršarodnym staŭ sa spačyłych”. Takim čynam, Jon jość pieršarodnym siarod usich, chto ŭvaskros ź miortvych, i tych, chto nikoli nie pamre, ale piarojdzie sa śmierci ŭ žyćcio. Hetaja viestka prynosić radaść usim, bo Ŭvaskrasieńnie Chrystova razburyła ŭładu śmierci. Vierujučyja ŭ Jaho čakajuć uvaskrasieńnia miortvych, i tamu ŭ śmierć Jaho achryścilisia, kab suvaskresnuć ź Im i mieć žyćcio viečnaje.
Ale daloki ad Chrysta śviet imkniecca da nazapašvańnia materyjalnych dabrotaŭ, bo ŭ hetym palahaje jaho nadzieja. Hety śviet biezrazvažna spadziajecca, što praz bahaćcie ŭniknie śmierci. Zabłukły čałaviek, dziela taho, kab nazapašvać bahaćcie, jakoje maje praciahnuć jaho žyćcio, sieje śmierć siarod inšych ludziej. Jany pazbaŭlajucca ekanamičnych mahčymaściaŭ svajho vyžyvańnia, i čaściakom nitka ich žyćcia, choć jany spadziajucca na vyratavańnie, žorstka pieraryvajecca.
Jaki žal! Heta vielizarnaja pamyłka. Žyćcio pieramahaje tolki praź vieru ŭ Chrysta i pryłučeńnie da Jaho.
Dośvied Pravasłaŭnaj Carkvy śviedčyć, što tyja, chto złučajecca z Chrystom, žyvuć i paśla śmierci, jany suprysutnyja žyvym, znachodziacca ź imi ŭ supolnaści, čujuć ich i časta cudoŭnym čynam adkazvajuć na ich prośby.
My bolej nie šukajem mifičnaj “žyvoj vady”. Nieśmiarotnaść jość ŭ Chryście, i praź Jaho jana prapanujecca kožnamu.
Dla taho, kab adny ludzi žyli, niama patreby źniščać inšych. Taksama nie pavinny hinuć mienš abaronienyja ludzi, u toj čas, jak inšyja majuć bolš hodnaje žyćcio. Chrystos prapanuje žyćcio ŭsim - i ziamnoje, i niabiesnaje. Jon uvaskros, i tyja, chto žadajuć, iduć za im šlacham Uvaskrasieńnia. I naadvarot, tyja, chto naŭprost ci ŭskosna sieje śmierć, miarkujučy, što jany praciahvajuć svajo žyćcio ci spryjajuć jamu, asudžajuć siabie samich na viečnuju pahibiel.
Uvaskrosły naš Hospad Isus Chrystos pryjšoŭ u śviet, kab usie ludzi mieli žyćcio i mieli z dastatkam. Vieryć, što čałaviečy rod dasiahnie roskvitu praz baraćbu, - heta ahromnistaja pamyłka. Chrystos uvaskrasiŭ pamierłych i skasavaŭ śmierć. Jon maje ŭładu, kab jaje pieraadoleć. Ab tym, što Jon pieramoh śmierć, śviedčyć Jaho varožaść da jaje. Chrystos pakazvaje nam šlach u žyćcio, i jon nam jaho viartaje - paśla taho, jak jano moža pierapynicca, bo Jon - “naša Žyćcio i Ŭvaskrasieńnie”. Tamu vierniki nie bajacca śmierci. Našaja siła - nie ŭ niaŭraźlivaści našaha isnavańnia, ale va ŭvaskrasieńni.
Chrystos uvaskros! I my ŭvaskreśniem!
Dyk paśledujma, uźlublenyja ŭ Chryście braty, siostry i dzieci, za Ŭvaskresłym Chrystom va ŭsich Jahonych spravach. Dapamahajma tym, chto nie maje srodkaŭ da isnavańnia. Uvaskrasieńnie Chrystova, praź jakoje śmierć była źniščana, abviaščajma ž siarod tych, chto pra jaho nie viedaje, kab i jany mahli saŭdzielničać va Ŭvaskrasieńni Jahonym, vieryć u Jaho i śledavać za Im. Našaje ž uvaskrasieńnie mahčymaje tolki tady, kali im my słužym dziela ŭvaskrasieńnia ŭsich našych bratoŭ i siaścior. Tolki tady pieramožnaja viestka “Chrystos uvaskros!” budzie dziejničać na zbaŭleńnie ŭsiaho čałaviectva. Daj Boža!
Śviataja Pascha 2012 h.