Paciarpiełaja ad terakta: «Paśla adkryćcia pomnika mianie vykrali nieviadomyja»

Kali Alena Lebiadzinskaja viartałasia dadomu paśla adkryćcia pomnika, jaje schapili dvoje nieviadomych, udaryli, pasadzili ŭ mikraaŭtobus i pavieźli ŭ milicyju.

«Na vychadzie sa stancyi mietro „Spartyŭnaja“ padlacieli dvoje nieviadomych i pačali mianie ciahnuć da mikraaŭtobusa. Ja zakryčała: „Ratujcie!“, tady jany ŭdaryli mianie ab sam mikraaŭtobus, i ŭ mianie byli raźbityja łob i kaleni. Potym zabrali telefon. Zavieźli ŭ Centralnaje RUUS, dzie mianie pytalisia, ci sapraŭdy ja prynosiła płakat z fatazdymkam, ci sapraŭdy ŭ mianie jaho zabrali. Mnie padałosia, što sami supracoŭniki milicyi byli ŭ ździŭleńni, navošta mianie pryvieźli i što sa mnoj rabić», — zajaviła Lebiadzinskaja.

Jana kaža, što jaje pratrymali ŭ milicyi niekalki hadzinaŭ:

«U 22.30 ja była ŭžo doma i vyklikała chutkuju dapamohu. Daktary kanstatavali hipiertaničny kryz, udary hałavy, prapanavali pajechać u lakarniu».

11 krasavika, kali adkryvali pomnik achviaram vybuchu u mietro, Lebiadzinskaja dastała płakat «Dziaržava admoviła ŭ dapamozie».

Płakat adrazu vyrvali supracoŭniki śpiecsłužbaŭ u cyvilnym.

«Terakt — heta złačynstva suprać dziaržavy, a nie suprać mianie asabista jak Aleny Lebiadzinski, tamu ja ŭ dziaržavy prasiła choć by dapamohi na leki i na adzieńnie, a atrymała jašče adny cialesnyja paškodžańni. Za što? Moj płakat tolki kanstatavaŭ, što ja prasiła dapamohi ad dziaržavy, a mnie ŭsiudy skazali, što ničym nie mohuć dapamahčy «, — kaža Lebiadzinskaja.

Jana kaža, što padčas vybuchu znachodziłasia na eskałatary:

«Ja była tam, kali abrynułasia stol. Adrazu mianie pavieźli ŭ lakarniu, abśledavali, prapanavali špitalizacyju, ale ja napisała admovu, vyrašyła doma lekavacca. Ranicaj 12-ha patelefanavali z palikliniki, skazali terminova pryjechać. U mianie byŭ kašal, tempieratura, vanitavała niekalki dzion čymści čornym. Ja napisała zajavu ŭ kamisiju dla vypłaty materyjalnaj dapamohi asobam, jakija paciarpieli ad aktu teraryzmu. Dla dapamohi, jak mnie skazali, treba zaklučeńnie sudmiedekspertyzy. Adnak ekśpiertyza pakazała, što ŭ mianie čamuści branchit».

Alena Lebiadzinskaja paviedamiła, što ŭ jakaści dapamohi ź Minharvykankama joj pryvieźli «1 litr aleju, kiłahram cukru i niekalki apielsinaŭ».

U milicyi Centralnaha rajona kamientavać situacyju admovilisia.

U pres-słužbie HUUS Minharvykankama adkazali, što kožny dzień pavodle roznych padstavaŭ zatrymlivajecca niekalki dziasiatkaŭ čałaviek, tamu «ničoha nie mahu vam ŭdakładnić pa dadzienym kankretnamu čałavieku».

Jak paviedamiła krynica tut.by u pravaachoŭnych orhanach, Lebiadzinskaja była zatrymanaja za niesankcyjanavany pikiet. Ci budzie jana za heta pakarana, pakul nieviadoma.

Kamientary da artykuła