U Minsku admienieny kanhres Asamblei NDA
Kiraŭnictva IBB admoviłasia dać pamiaškańnie dla praviadzieńnia kanhresa.
Čarhovy, siomy pa liku,
Asambleja NDA — najbujniejšaje ŭ Biełarusi abjadnańnie niaŭradavych demakratyčnych arhanizacyj i inicyjatyŭ. Zasnavana ŭ 1997 hodzie, siońnia ŭklučaje bolš za 300 arhanizacyj.
Asamblei NDA trojčy admaŭlali ŭ rehistracyi ŭ Biełarusi. U 2011 hodzie abjadnańnie było zarehistravana ŭ Litvie.
Jak adznačyŭ Lisičonak, IBB «byŭ by rady pryniać hety forum». «Adnak Minharvykankam, jaki maje dolu ŭłasnaści ŭ hetym pamiaškańni, raptam admoviŭ nam u arendzie. Siońnia ŭvieś dzień praciahvalisia pieramovy ŭ Minharvykankamie, ale jany skončylisia ničym. My vymušany pieranieści mierapryjemstva na inšy dzień, jaki paviedamim dadatkova», — skazaŭ jon.
«Admova ŭ praviadzieńni bujnoha forumu hramadzianskaj supolnaści ŭ Biełarusi jašče raz pakazvaje na toje, što ŭłady Biełarusi praciahvajuć supraćpastaŭlać siabie hramadstvu. Vidavočna, što heta palityčnaje rašeńnie, jakoje prymałasia nie ŭ ścienach Minharvykankama», — zajaviŭ Lisičonak.
Ciapier, pavodle jaho słoŭ, arhkamitet kanhresa abmiarkoŭvaje pieranos mierapryjemstva na červień.
Lisičonak adznačyŭ, što na forum byli zaprošany pradstaŭniki hramadskich arhanizacyj raznastajnych intaresaŭ. Na praciahu dvuch dzion pradstaŭniki prykładna 200 arhanizacyj — členaŭ Asamblei NDA płanavali nie tolki abrać novaje kiraŭnictva, ale i abmierkavać stan hramadzianskaj supolnaści, raźvićcio rehijanalnych inicyjatyŭ, maśmiedyja, prasoŭvańnie hramadskaha dyjałohu, uzajemadziejańnie z palityčnym siektaram, rolu Asamblei NDA ŭ Biełarusi.
U pieršy dzień mierapryjemstva ŭdzielniki płanavali zasłuchać spravazdaču kiraŭnictva pra dziejnaść za minułyja try hady. Pavinny byli być pryniaty rezalucyi i zajavy pa najbolej aktualnych pytańniach dziejnaści arhanizacyj treciaha siektara, adnosin pamiž hramadzianskaj supolnaściu i dziaržavaj, dyjałohu ŭnutry hramadstva.
Na druhi dzień byŭ zapłanavany fiestyval hramadskich arhanizacyj u vyhladzie videaprezientacyj dziejnaści i stendaŭ. Lepšyja arhanizacyi mierkavałasia ŭznaharodzić kaštoŭnymi padarunkami.
U panelnych dyskusijach «NDA i hramadstva», «NDA i Jeŭropa» ekśpierty z roznych abłaściej płanavali abmierkavać, što mohuć dać NDA hramadstvu Biełarusi, ci mahčyma realizacyja prajeŭrapiejskich prajektaŭ NDA biez supracoŭnictva ź dziaržaŭnaj uładaj Biełarusi i inšyja važnyja pytańni.