Izrailski pasoł ahučyŭ umovy ŭviadzieńnia biaźvizavaha režymu
Biaźvizavy režym pamiž Izrailem i Biełaruśsiu budzie ŭviedzieny, kali tavarazvarot dźviuch krain nablizicca da 1 młrd. dołaraŭ, zajaviŭ izrailski pasoł
Admiena vizavaha režymu pamiž Biełaruśsiu i Izrailem mahčymaja pry značnym pašyreńni sacyjalna-ekanamičnych suviaziaŭ, zajaviŭ, naviedvajučy 4 maja Mahiloŭ, pasoł Dziaržavy Izrail u Biełarusi Iosif Šahał.
«Admiena vizavaha režymu nie samameta. Heta łahičnaje zaviaršeńnie ŭsiaho kompleksu sacyjalna-ekanamičnych suviaziaŭ, mierapryjemstvaŭ, akcyj», — zajaviŭ BiełaPAN Šahał. Pavodle jaho mierkavańnia, kali tavaraabarot «budzie nabližacca, skažam, da 1 młrd. dołaraŭ u hod», pytańnie admieny viz paŭstanie vostra.
«Na siońniašni dzień heta ŭsiaho tolki pažadańnie, i my nie majem pakul realnych pieradumoŭ dla hetaha. Ja raźličvaju, što praz hod-paŭtara my nablizimsia da hetaha, i dumaju, heta realna», — adznačyŭ pasoł, zhadaŭšy, što ŭ 2011 hodzie tavaraabarot pamiž dźviuma krainami skłaŭ usiaho 70 młn. dołaraŭ. Jon nazvaŭ hetyja ličby mizernymi, «uličvajučy patencyjał i Biełarusi, i Izraila». «Jość usie padstavy, što hetyja ličby buduć pavialičany, i, mahčyma, navat na paradak», — skazaŭ Šahał.
«Płanujucca inviestycyjnyja prajekty, źviazanyja najpierš ź sielskaj haspadarkaj. Užo niekalki izrailskich firm ažyćciaŭlajuć prajekty na terytoryi Biełarusi, budujuć u ahrapramysłovym kompleksie pradpryjemstvy pavodle izrailskich technałohij — heta i ptuškahadoŭla, i śvinahadoŭla, i vytvorčaść indyčyny, rybavytvorčaść — ad malkoŭ da hatovaj pradukcyi, — adznačyŭ dypłamat. — Heta tolki pačatak, choć pačatak dosyć aktyŭny i ŭžo daje ličby na paradak vyšejšyja za tyja, što byli pavodle vynikaŭ usiaho minułaha hoda».
Akramia taho, pasoł ličyć, što buduć raźvivacca suviazi pamiž izrailskimi i biełaruskimi rehijonami: «Naprykład taja ž Mahiloŭskaja vobłaść. Tut jość peŭny popyt na peŭnyja prajekty, jość mahutnaści, pracoŭnyja resursy. Nieabchodna prosta sumiaścić izrailskija technałahičnyja mahčymaści i infrastrukturu Biełarusi. Ja dumaju, što najbližejšyja niekalki miesiacaŭ daduć nam peŭny vynik».
Pavodle jaho słoŭ, umacoŭvajucca i kulturnyja suviazi pamiž dźviuma krainami. Iosif Šahał nazvaŭ Dni jaŭrejskaj kultury ŭ Mahilovie śviatam izrailska-biełaruskaj družby.