Adpačynak-2012: Kolki kaštuje Turcyja, a kolki — Astraviec?

Jakija maršruty papularnyja sioleta? Raskazvaje redaktarka haziety «Turizm i otdych» Lilija Kobzik.

Vandroŭka pa Astravieččynie — adzin z samych papularnych sioleta maršrutaŭ. Kaścioł u Hierviatach.

Ahrasiadziba «Try skrypki» na Miadzielščynie prapanuje aktyŭny adpačynak i znajomstva z tradycyjami.

U Krymie možna znajści adpačynak na luby kašalok.

Vyspa Korfu ŭ Hrecyi — adna z turystyčnych navinak siezonu.

Hrecyja streliła

Lilija Kobzik stavić na pieršaje miesca pa papularnaści ŭ hetym siezonie Turcyju — biełarusy lubiać, kab usio było ŭklučana.

Dalej idzie Hrecyja, jakaja sioleta prapanuje try novyja vyspy. Uvohule, adznačaje Lilija Kobzik, sioleta Hrecyja streliła: z pryčyny kryzisu jość šmatlikija źnižki i bonusy.

Na trecim miescy — Krym. Tut možna znajści adpačynak na kožnuju kišeniu: hateli, zdymnyja kvatery ci damki. «U Bałharyi nie zdymieš pakoj za 7 jeŭra.

Tam treba raźličvać na 1000 jeŭra na dvuch čałaviek. U toj ža čas u Krymie na tym ža Čornym mory možna adpačyć za 300—400 dalaraŭ», — kaža redaktar «TiO».

Akramia taho, z hetaha hoda Bałharyja padoŭžyła termin vydačy nacyjanalnaj vizy da 2—3 tydniaŭ. Hetaja kraina na 4-m miescy pa papularnaści. Ź lubimych kurortnych krainaŭ biełarusaŭ Lilija Kobzik vyłučaje taksama Čarnahoryju.

Biełaruskija piensijaniery jeździać pa Jeŭropie

Mnohija biełarusy addajuć pieravahu pierad lažańniem na plažy aŭtobusnym vandroŭkam.

«Tut niama vyraznaha lidara — biełarusy lubiać usiu Jeŭropu», — kaža Lilija Kobzik.

Zamiežnyja turapieratary charaktaryzujuć biełarusaŭ jak cikaŭnych ludziej, u jakich muziei i architektura čaściej na pieršym miescy. Apošnija 5-7 hadoŭ u nas staŭ papularny kalektyŭny aŭtobusny turyzm. Z časam sabrałasia hrupa ludziej ź Biełarusi i Rasii, jakaja razam aranduje aŭtobus i navat prapanuje turfirmie ŭłasny maršrut — u hetym hodzie jeduć pa Francyi, u nastupnym pa bałkanskich krainach. U hetych hrupach, padkreślivaje Lilija Kobzik, davoli šmat ludziej stałaha vieku. Biełaruskija piensijaniery asvojvajuć turystyčnuju Jeŭropu.

Tendencyja aŭtobusnaha turyzmu pa-biełarusku: ajčynnyja apieratary ŭsio čaściej absłuhoŭvajuć rasijskich turystaŭ, biełarusy ž jeduć u Paryž na polskich aŭtobusach.

Kolki kaštuje aŭtobusny tur
Tydniovaja vandroŭka ŭ Paryž, Prahu, Bierlin i Varšavu, naprykład, kaštuje kala 300 jeŭra. Piacidzionnaja vandroŭka pa Vienhryi, z mahčymaściu naviedać Vienu, kaštuje kala 180 jeŭra. Naviedvańnie piaci sučasnych jeŭrapiejskich stalic i dadatkova 1-2 byłych kaštuje kala 550 jeŭra.

Turystyčny honar ratujuć ahrasiadziby

Biełaruskija sanatoryi, u jakija było nie ŭbicca z-za napłyvu rasiejcaŭ, pastavili pierad biełarusami novuju — niaprostuju zadaču. «Raniej pa telefonie ŭ sanatoryi ŭ čałavieka pytali nacyjanalnaść i biełarusam čaściej za ŭsio admaŭlali. Bo rasiejec bolš zapłacić», —kaža Lilija Kobzik. Ciapier ža i sami biełarusy admaŭlajucca, kali čujuć canu — u siarednim za 12 dzion adpačynku ŭ biełaruskim sanatoryi treba zapłacić kala 7 miljonaŭ rubloŭ.

Pa słovach redaktara, rynak ajčynnaha sanatornaha adpačynku faktyčna znachodzicca ŭ Rasii. Skłałasia situacyja, kali sanatoryi prapanujuć peŭny ŭzrovień pasłuh i padvyšanuju canu. Dla rasijskaha turysta jana supastaŭnaja z adpačynkam u Vienhryi.

Balučaj prablemaj zastajecca infrastruktura. U mnohich haradach, praź jakija pralahajuć turystyčnyja maršruty, nie chapaje restaranaŭ i hatelaŭ.

«Niama takoj krainy, dzie b turyzmam zajmałasia vyklučna dziaržava», — kaža Lilija Kobzik. Hetaja śfiera najlepš raźvivajecca ŭ pryvatnych rukach. Jak dokaz — ahraturyzm, jaki burna raźvivajecca ŭ Biełarusi apošnija hady. Faktyčna, ahrasiadziby baroniać honar ajčynnaha turyzmu. «Ale heta nie ratuje situacyju, bo taki adpačynak na 2-3 dni», — miarkuje spadarynia Kobzik.

Zhadvajučy historyi pra rasijskich turystaŭ, jakija pryjazdžajuć da nas papić harełki, jana kaža, što hości z Rasii zdolnyja i na pryjemnyja siurpryzy.

«Mnohija ź ich jeduć da nas na aŭto ź siemjami i dabirajucca ŭ takija kutočki, pra jakija i my da svajho soramu nie zaŭsiody viedajem. I my, na žal, amal ničoha nie robim dla takich cikaŭnych haściej».

Papularny Astraviec

Turystyčnaja kampanija «Viapol» śpiecyjalizujecca na adpačynku ŭ Biełarusi. Jana prapanuje tematyčnyja maršruty: histaryčnyja, architekturnyja, pa miaścinach znakamitych ludziej, pryrodnyja.

Pa słovach dyrektara kampanii Haliny Patajevaj, adnym z samych papularnych maršrutaŭ źjaŭlajecca tak zvanaja Astravieckaja kruhaśvietka. Maršrut uklučaje naviedvańnie Kušlanaŭ, Sołaŭ, Astraŭca, Hierviataŭ, Varnianaŭ i Michališak. Naturalna, vialikaj papularnaściu karystajucca maršruty Minsk — Mir — Niaśviž — Navahrudak, a taksama naviedvańnie Dudutak.

Cikava, što kala pałovy hrupy zvyčajna składajuć rasiejcy.

Kolki kaštuje bierah turecki

Turcyja

Biełaruskija turfirmy prapanujuć adpačynak na tureckich kurortach ad $360 za tydzień u 3-zorkavym hateli (vylet z Maskvy, zasialeńnie ŭ numar dla 2 čałaviek), da $1300 i vyšej u 5-zorkavym.

Hrecyja

Plažny adpačynak z ekskursijami kaštuje ad 320—340 jeŭra z čałavieka za tydzień.

Krym

U pansijanatach Kaktebiela možna pasialicca za $180 za sutki ŭ pačatku siezona, u lipieni-žniŭni daviadziecca addać da $300. Siamiejny adpačynak bieź vialikich zapatrabavańniaŭ zabiaśpiečać drobnyja pryvatniki. Tak, naprykład, u Ałupcy možna źniać damok na 3-4 čałavieki za 200 tysiač biełaruskich rubloŭ u sutki. Bolš kamfortnaje žytło ź internetam i łaźniaj kaštuje kala $100 za damok na 7-8 čałaviek.

Kolki kaštuje vandroŭka pa Biełarusi

2-dzionny tur z naviedvańniem Dudutak, Mira i Niaśviža dla hrupy z 10 čałaviek kaštuje da 110 jeŭra, 3-dzionny — da 135. Apłata ŭklučaje charčavańnie ŭ restaranie i načleh u hateli. Pryblizna stolki ž kaštuje vandroŭka ŭ Viciebsk i Połack.

Košt adpačynku ŭ ahrasiadzibach zaležyć ad miesca i jakaści žytła. Možna znajści siadzibu i za 10 dalaraŭ, a jość i za 50, i vyšej.

Kamientary da artykuła