Byłomu namieśniku staršyni Mahilova dali try hady, ale jon vyzvaliŭsia pa amnistyi

18.09.2012 / 17:05

Sudovaja kalehija pa kryminalnych spravach Mahiloŭskaha abłasnoha suda pakinuła ŭ sile vyrak suda Leninskaha rajona Mahilova ŭ dačynieńni da byłoha namieśnika staršyni Mahiloŭskaha harvykankama Uładzimira Citka i dziejnaha dyrektara AAT «Pramžyłbud» Leanida Bałdzienki.

Pra heta paviedamlaje pres-słužba Upraŭleńnia KDB pa Mahiloŭskaj vobłaści.

Abodva jany byli pryznanyja vinavatymi ŭ kradziažy šlacham złoŭžyvańnia słužbovymi paŭnamoctvami. Sud Leninskaha rajona Mahilova 30 maja 2012 hoda pryhavaryŭ Citka da pazbaŭleńnia voli na 3 hady z kanfiskacyjaj majomaści. Jon byŭ taksama pazbaŭleny prava zajmać pasady, źviazanyja z vykanańniem arhanizacyjna-rasparadčych abaviazkaŭ. Bałdzienku sud vynies anałahičny pryhavor, ale z adterminoŭkaj vykanańnia na 2 hady. Padsudnyja admovilisia pryznać svaju vinu i padali kasacyjnuju skarhu.

Zhodna z materyjałami spravy, kuryrujučy rabotu budaŭničaj haliny i słužby pa ziemleŭparadkavańni, były namieśnik staršyni harvykankama, skarystaŭšy słužbovaje stanovišča z karyślivymi metami, arhanizavaŭ vydzialeńnie na padstaŭnuju asobu ziamielnaha ŭčastka ŭ prestyžnym rajonie horada — kala Piačorskaha lesaparku.

Kab minimizavać zatraty na budaŭnictva na atrymanym učastku ŭłasnaha pryvatnaha doma, čynoŭnik źviarnuŭsia da dyrektara AAT «Pramžyłbud» z prośbaj dać jamu biez zaklučeńnia adpaviednaha dahavora i apłaty nieabchodnuju śpiecyjalnuju techniku, hruzavy aŭtatranspart, budaŭničyja materyjały, a taksama nakiravać na abjekt rabočych budaŭničych śpiecyjalnaściaŭ.

Jak adznačajecca ŭ pres-relizie UKDB, niahledziačy na niepravamierny charaktar prośby čynoŭnika, dyrektar pradpryjemstva arhanizavaŭ z kastryčnika 2007 hoda pa kastryčnik 2009 hoda vytvorčaść rabot, źviazanych z budaŭnictvam pryvatnaha doma. U vyniku čaho AAT «Pramžyłbud» byŭ naniesieny ŭron u bujnym pamiery.

Citok na sudzie zajaŭlaŭ ab tym, što nie źbiraŭsia vykradać budmateryjały i dumaŭ za ich raźličycca.

Adnak sudovaja kalehija paličyła jaho dovady niehruntoŭnymi, bo zakonnych padstaŭ na nabyćcio materyjałaŭ u čynoŭnika nie było. A častkova kampiensavać pryčynieny ŭron Citok vyrašyŭ tolki paśla inicyjavanaj supracoŭnikami KDB pravierki AAT «Pramžyłbud» kantrolnymi orhanami, paviedamlaje pres-hrupa UKDB pa Mahiloŭskaj vobłaści.

Zhodna z paviedamleńniem, Bałdzienka, jaki ciapier zajmaje raniejšuju pasadu, budzie vyzvaleny ad pasady ŭ najbližejšy čas.

Admietna, što kala tydnia tamu Citok byŭ vyzvaleny ź miescaŭ źniavoleńnia pa amnistyi. Ab hetym paviedamiła BiełaPAN advakat padsudnych Marharyta Fiedarčuk. U toj ža čas jana admoviłasia prakamientavać rašeńnie sudovaj kalehii Mahiloŭskaha abłasnoha suda ŭ dačynieńni da jaje padabaronnych.

Čytajcie taksama:

Kamientary da artykuła