Chronika represij i zatrymańniaŭ za 11 — 17 krasavika
11 krasavika
U Homieli papiaredzili
Abłasnaja prakuratura inkryminuje Siarhieju Nieściaroviču parušeńnie zakonu ab svabodzie sumleńnia i relihijnych arhanizacyjach. Jamu zakidajuć systematyčnaje ładžańnie schodaŭ niezarehistravanaj relihijnaj supołki ŭ svajoj kvatery, a taksama zbory hrašovych srodkaŭ. Prakuratura nazyvaje hetuju supołku bractvam u honar Pieramianieńnia Haspodnia. Pavodle Nieściaroviča, płyń z takoj nazvaj źjaviłasia niekalki hod tamu ŭ Rasiei. Bractva, zasnavanaje ajcom Hieorhijem Kačatkovym, abjadnoŭvaje niekatorych viernikaŭ pravasłaŭnaj carkvy.
Prakurorski rabotnik Jelisiejeŭ nie paznajomiŭ S. Nieściaroviča z materyjałami spravy, bo ŭ jaho było ŭžo hatovaje aficyjnaje papiaredžańnie.
Pry paŭtornym parušeńni Nieściaroviča mohuć pryciahnuć da administratyŭnaj ci kryminalnaj adkaznaści.
12 krasavika
Kadebešniki maskirujucca
10 krasavika ŭ Homieli, la cyrku, nieviadomyja ŭ cyvilnym zatrymali studentku stypendyjalnaj prahramy Kalinoŭskaha Volhu Dźmitruk. Dziaŭčyna pryjechała z Polščy na paru dzion, kab razam z baćkami pravieści vielikodnyja śviaty.
Volhu dapytvali pra homielskich moładzievych aktyvistaŭ, pieradusim tych, chto vymušany ciapier žyć za miažoj. Dziaŭčynie, ź jaje słovaŭ, prapanoŭvali supracoŭnictva i pahražali prablemami sa zdaroŭjem.
12 krasavika Taćcianu Dźmitruk, maci Volhi, niečakana vyklikaŭ na pracu načalnik. Žančyna pracuje ŭ miascovaj bolnicy, na toj momant była na vychodnym. U kabinet zajšoŭ nieviadomy mužčyna, jaki nazvaŭsia homielskim supracoŭnikam hazety «Sovietskaja Biełoruśsija». Jon sprabavaŭ vieści hutarku pra dačku. Paśla sychodu nieviadomaha ŭ žančyny pačalisia prablemy na pracy. Taciana Dźmitruk kaža, što ciapier na pracy ŭsie viedajuć pra jaje sytuacyju. «Žurnalist», pa jaje słovach, adšukaŭ jaje nie praz adździaleńnie, u jakim jana pracuje i dzie jość usie nieabchodnyja źviestki pra persanał, a naŭprost praz kiraŭnictva bolnicy.
Na dadzieny momant Volha Dźmitruk znachodzicca ŭ Polščy.
13 krasavika
Hamielčuka prymusili
U vyniku administracyjnaha cisku homielski aktyvist AHP Mikałaj Kaluka adazvaŭ svoj podpis pad zajaŭkaj na pikiet, jaki planujecca pravieści ŭ Homieli 26 krasavika. Z vyšejšaj instancyi namieśniku dyrektara pa idealohii niekalki razoŭ telefanavali i prasili, kab padnačaleny Kaluka źniaŭ svoj podpis. Telefanavali i dachaty Kaluku z nastojlivaj rekamendacyjaj adazvać podpis pad zajaŭkaj. U vyniku aktyvist adnios zajaŭku načalniku ŭpraŭleńnia idealohii pa Homielskaj vobłaści Kaciłu, u jakoj paznačyŭ, što admaŭlajecca być inicyjataram čarnobylskaha pikietu.
Viarchoŭny sud admoviŭ
Viarchoŭny sud Biełarusi nie zadavoliŭ skarhu Sajuzu palityčnych partyjaŭ «Sajuz levych partyjaŭ» na admovu Ministerstva justycyi zarehistravać arhanizacyju.
Milinkieviča nie puskajuć
Pieršy telekanał Biełarusi admoviŭ lideru biełaruskaj apazicyi Alaksandru Milinkieviču ŭ žyvym efiry 25 krasavika. 6 krasavika A.Milinkievič piśmova źviarnuŭsia da staršyni Nacyjanalnaj dziaržaŭnaj teleradyjokampanii Alaksandra Zimoŭskaha z prośbaj dać jamu, ekspertam i likvidataram žyvy efir 25 krasavika a 18 hadzinie, kab «dać niezaležnuju acenku dziejnaści dziaržaŭnych orhanaŭ pa pieraadoleńni nastupstvaŭ Čarnobylskaj avaryi».
14 krasavika
Da Kazulina nie dachodziać
Padčas sustrečy z advakatam Alaksandar Kazulin adznačyŭ, što da jaho apošnim časam nie dachodziać navat niekatoryja zakaznyja listy i listy z apaviaščeńniami. Toje što dachodzić, padviarhajecca cenzury.
Pa słovach advakata, A.Kazulin pa‑raniejšamu znachodzicca na režymie dyjetyčnaha charčavańnia «5B».
Sadoŭskuju mohuć vyzvalić
Pravaabaronca Kaciaryna Sadoŭskaja, mahčyma, vyjdzie na volu da kanca krasavika. Pra heta jana sama paviedamiła ŭ liście damoŭ, spasłaŭšysia na rašeńnie turemnaj kamisii rekamendavać dla jaje ŭmoŭna‑daterminovaje vyzvaleńnie. Ź jaje ŭžo ŭziali padpisku, što žančyna nikoha nia budzie «źnievažać». K.Sadoŭskaja była asudžanaja da dvuch hadoŭ źniavoleńnia za źniavahu sudździ.
17 krasavika
Na Radunicu pamianuli
U paminalnaj akcyi ŭ Kurapatach pryniali ŭdzieł niekalki dziasiatkaŭ čałaviek — pradstaŭniki intelihiencyi, moładzi, represavanyja i ich rodnyja. 29 krasavika pa ŭsioj Biełarusi pačnucca štomiesiačnyja akcyi pamiaci achviaraŭ stalinizmu ŭ miescach ich masavaha źniščeńnia.
Huminskaha ciahajuć
Sieržuka Huminskaha sudzili 17 krasavika ŭ aršanskim haradzkim sudzie, niezvažajučy na vychodny dzień. Sudździa Siarhiej Bondaraŭ pryznaŭ Huminskaha vinavatym u drobnym chulihanstvie. Pavodle sudovaje pastanovy, moładzievy aktyvist musić 12 sutak pravieści ŭ izalatary časovaha ŭtrymańnia. Aficyjnaja pryčyna zatrymańnia — niećviarozy stan i brydkasłoŭje ŭ hramadzkim miescy. Adnak medyčnaja ekspertyza nie paćvierdziła ŭžyvańnia Huminskim ałkaholu. Paplečniki Huminskaha ličać jahonaje zatrymańnie preventyŭnaj mieraj — kab chłopiec nia ŭdzielničaŭ u ahulnaharadzkoj akcyi, pryśviečanaj Čarnobylskaj trahiedyi. Zajaŭku na praviadzieńnie ahulnaharadzkoj imprezy ŭ subotu, 28‑ha krasavika, miascovyja aktyvisty ŭžo padali ŭ vykankam. Siaržuk Huminski maje vyzvalicca tolki 29 krasavika.