Andrej Skurko. Biblijateka

mienskija nietry

Biblijateka

Da dzieviaci antyhrypoznych zapavietaŭ A.Uciuhoviča (hł. pazaminuły numar «NN») možna — dziela poŭnaje adpaviednaści — dadać jašče adzin, dziasiaty: pakolki lepšaje «maliny» dla nachabnaha virusa, čymsia pieraachałodžany arhanizm, i prydumać nielha, niepažadana doŭha znachodzicca ŭ ściudzionych, nastyłych pamiaškańniach. U pryvatnaści, u Nacyjanalnaj biblijatecy, błukajučy pa vializnych zalach dy katalohach jakoj nijak nia možaš daŭmiecca, ci to hety budynak raźličany, pavodle temperaturna-klimatyčnaje adpaviednaści, na Paŭdniovuju Radeziju, ci to byŭ zbudavany tut admysłova — dziela nazirańnia za uździejańniem nizkich temperaturaŭ na žyćciadziejnaść i pracazdolnaść čałavieka. Treba skazać, što paśla troch hadzinaŭ hetkaha kštałtu terapii apošni robicca — jak na vyhlad, tak i navobmacak — padobnym da słavutaje siniaje ptuški (tolki nie da Meterlinkaŭskaje, a da našaje, rodnaje, z pryłaŭku kulinaryi).

Akramia ŭsieabdymnaha choładu (kvoleńkaje ździeklivaje ciapło batarejaŭ tolki katalizuje jaho), «Nacyjanałka» vyznačajecca svaimi čerhami. Niama, vidać, anivodnaha naviednika, jakomu b choć raz — razam z dumkaj, što jon bieznadziejna ŭsiudy spaźniŭsia, adstajaŭšy kilametrovy «chvost», — nie pryjšli ŭ hałavu słavutyja «niekulturnyja słovy i vyrazy ŭ bok supracoŭnikaŭ biblijateki i samoj biblijateki» (vytrymka z zahadu ab pazbaŭleńni prava karystacca NB RB).

Usio heta, dy jašče aryhinalnaść, jakoj vyznačajecca persanał (naprykład, babula-harderobščyca moža ŭspryniać prośbu padać sumku, u jakoj — at, hałava! — zastaŭsia čytacki bilet, jak asabistuju abrazu, a vachcior-adstaŭnik lubić pahulać u mytniu, vyšukvajučy ŭ vašaj tečcy vybuchovyja rečyvy abo «drukavanuju pradukcyju»), vyklikała, vidać, cełuju łavinu skarhaŭ, jakimi niaŭdziačnyja čytačy litaralna zakidvajuć usie mahčymyja i niemahčymyja instancyi. Prynamsi, ničym inšym nielha patłumačyć niadaŭniaje rašeńnie ŭładaŭ pieranieści biblijateku ŭ inšy budynak — kudy dalej ad centru. A što — tam, vidać, i pamiaškańnie možna znajści ciaplejšaje, i naviednikaŭ nia tak mnoha budzie — chiba što Makar ź cialatami...

Andrej Skurko