Michał Zaleski. Viartańnie siły

---

 

pazytyvy

Viartańnie siły

 

Padychodzić niejak kuryca da śvińni dyj kaža:

— Davaj supracoŭničać!

— A što rabić budziem? — śvińnia pytajecca.

— Jak što? Toje, što ŭsim patrebna — jaječniu sa skvarkami.

Karaciej kažučy, rozny biznes byvaje. Inšym dyk i chvalicca soramna. Soram ža, jak usim viadoma, uprost źviazany z kulturaj, da jakoj asoba naležyć.

Pieramoha kamunistaŭ u Rasiejskaj imperyi zakłała padmurak novaj kultury, pabudavanaj na idei štodzionnaj hatoŭnaści baranicca ad varožaha napadu i vykonvać internacyjanalny abaviazak u luboj kropcy ziamnoj kuli, aby praletaryjaŭ z-pad pryhniotu vyzvalić chutčej. KVŽD, Chasan, Chałchin-Hoł, Karelija, Hišpanija, Polšča… Heta było da Vialikaj vajny.

Usiaśvietnaje procistajańnie i honka ŭzbrajeńniaŭ paradnili Kraj sa stalovym kułakom Čyrvanaściažnaj Biełaruskaj Vajskovaj Akruhi i razhalinavanaj vytvorčaściu sučasnaj zbroi. Tamu kryvioj našych lepšych vajaroŭ palitaja ziamla 20 krainaŭ śvietu, a ŭ spadčynu ad SSSR zastałosia 58 vajennych zavodaŭ i 24 vajennych NDI i KB.

Nazyvalisia jany «abaronnyja». Jak nia stała ad kaho baranicca dy nie było na kaho napadać, popyt na ichnuju pradukcyju ŭsio źmianšaŭsia i dajšoŭ narešcie z 70% ad ahulnaj pramysłovaj vytvorčaści da 10%. Ale ž byli niedzie ludzi, što daloka hladzieli. Jany nia stali zajmacca tut durackimi pryvatyzacyjami i kanversijami, što vydumali jajkahałovyja daradcy kapitalistaŭ.

«VPK krainy ŭdałosia zachavać», — dałažyŭ pamočnik ministra pramysłovaści Biełarusi ŭ pytańniach pracy VPK sp.Uł.Čekaŭ.

Bolš za toje, jon adznačyŭ: «Stvareńnie Sajuznaj dziaržavy Biełarusi j Rasiei spryjaje adnaŭleńniu kaaperacyi ŭ vytvorčaści abaronnaj pradukcyi». Bieź vialikaha šumu robiać svaju spravu miždziaržaŭnyja finansava-pramysłovyja hrupy «Hranit», «Elektronika», «Abarončyja systemy», cichieńka rychtujucca ŭstanoŭčyja papiery na hrupu «Internavihacyja».

 

Sioleta pastaŭki spectechniki ŭ Rasieju pavialičacca nia mienš, čym na 15%. Z ulikam sumiesnaha abaronnaha zakazu i ahulnaj prahramy ŭzbrajeńniaŭ hetyja abjomy ŭzrastuć jašče bolej, miarkuje ŭradavy ekspert.

Z ekanamičnaha hledzišča vydatna atrymlivajecca. Tolki niejkija brydkija dumki ŭ hałavu lezuć, kali bačyš, jak miesiać roznyja ludzi va ŭsim śviecie adzin adnaho mocnaj rasiejskaj zbrojaj z chitrym biełaruskim načyńniem. Niaŭžo my hetki narod, što musim žyć i radavacca, jak niedzie vajujuć? Niachaj mnie niechta patłumačyć, dziela čaho hetkaje treba krainie, jakaja źbirajecca siabravać z usimi pa ŭsich azymutach.

Kali ž našyja pravadyry majuć sakretnyja źviestki, što niechta źbirajecca na nas napaści, dyk niachaj chutčej razdajuć zbroju ŭsim mužčynam i śpiać spakojna.

Michał Zaleski